Qimussersinnaanngorput
Avannaata Qimussersui qaammatip tulliani ingerlanneqarnissaat KNQK-p pilersaarutigaa. Katersuunnissamut piumasaqaatit tamaasa naammassiniarsaraagut, kattuffiup siulittaasua oqarpoq.
Qimmit anuleriaannanngorput qimoriarsagassallu qimoriarsarlugit.
Avannaata Qimussersui, nuna tamakkerlugu peqataaffigineqartussat martsip naanerani ingerlanneqartussanngorput.
Kalaallit Nunaanni Qimussertartut Kattuffianni siulittaasoq nuannaaqisoq, Johan Olsen Sermitsiaq.AG-mut taama oqaluttuarpoq.
- Nuannaaqaanga Naalakkersuisut aalajangermata kommunit akimorlugit peqataaffigineqarsinnaasunik aaqqissuussanik ammaassimmata. Periarfissaq akorparput, kommunillu arlallit peqataaffigisinnaasaannik qimussersuaqarnissamik maanna pilersaarusiorluta, Johan Olsen Sermitsiaq.AG-mut oqaluttuarpoq.
Qinnuteqaat nassiunneqarpoq
Naalakkersuisut coronamut killilersuutinik qasukkaallatsitsineri aprilip qiteqqunnerata tungaanut atuuttut pissutigalugit innuttaasut kommuninit arlalinneersut katersuuffigisinnaasaannik aaqqissuussisoqartoqarsinnaalerpoq, illoqarfinni coronavirusimik tunillatsiffiusimanngitsuni.
- Unammersuarnissat iluatsikkumallugit piumasaqaatit maanna suliarivagut. Aamma allanik periarfissaasinnaasunik misissuivugut, Ilulissani unammisoqartinnagu tunillatsissimasunik nassaartoqassagaluarpat, illoqarfiit sorliit periarfissaanersut paasiniarlugit, KNQK-mi siulittaasoq Sermitsiaq.AG-mut oqarpoq.
Meeqqat qimussersuaaraat 23. marts ingerlanneqassaaq, Avannaatalu Qimussersui 27. marts nassaarineqassalluni.
Unammersuarneq siullermeertoq
Avannaata Qimussersua ukioq manna ingerlanneqalerpat siullermeertumik Qaanaamiit Tunumiillu peqataasoqassaaq.
KNQK-mi siulittaasoq nassuiaavoq illoqarfinniit nunaqarfinniillu peqataasinnaasut qimmeqatigiiaat pingasuusinnaasarumaartut. Taamaammat misissorneqarpoq inersimasut qimmii meeqqat unammersualerpata atukkiunneqarsinnaassanersut.
- Timmisartumi inissat aallaavigalugit qamutit pingasut qimmiilu kisimik inissaqarsinnaassapput. Sumiiffinniit qimussit amerlanerpaamik pingasut ilaasarsinnaammata, KNQK-mi siulittaasoq oqarpoq.
Taanna oqaluttuarpoq qimussersuaqartoqarnissaanut qinnuteqaat nassiunneqareersimasoq, akissutissarlu Nunatta Nakorsaaneqarfianiit maanna utaqqineqaannalersoq.
- Isumalluarpugut. Naatsorsuutigaarput qimussersuarnissaq iluatsissasoq, oqarpoq.
Taanna ilisimatitsivoq qimussit 40-t missaat peqataassagunartut.
Qeqertarsuaq nunaqarfillu Kangerluk qimussersuarnit suli peqataasinnaanngikkallarput. KNQK-p ernummatigaa qimmit taakkunaneersut akusaaratarsimasinnaanerat, qimmillu DNA-visa misissuiffigineqartinnagit unammersuarnernit peqataasinnaanngitsut aalajangerneqarsimavoq.