Naatsorsuinermut tunngavigisaq isertuunneqartoq
Naalakkersuisut aqutsinermut inatsit naapertorlugu Greenland Mineralsip Kuannersuarni suliniummit royaltiesinut akileraarutinut naatsorsuinermut tunngavigisaanik tunniussisinnaanngillat. Aningaasarsiornermi professori naatsorsuinerit taama ittut ataatsimiititaliani oqaluuserineqarnissaannik kaammattuuteqarpoq.
Ukiumut 1,52 milliarder koruunit imaluunniit ukiut 37-t ingerlaneranni 56 milliarder koruunit. Taakkuupput Greenland Mineralsip Kuannersuarni aatsitassarsiorfimmit tunisassiorneranit royaltiesit akileraarutillu malitsigisaannik Namminersorlutik Oqartussanut tunniunneqartussatut ilimasaarutigineqartut.
Paarlattuanik naatsorsuigaanni aatsitassarsioqatigiiffiup tassa naatsorsuutigaa saffiugassanik qaqutigoortunik ukiumut 30.000 tonsinik, zinkimik 15.000 tonsinik, flusspatimik 8.700 tonsinik aamma uranoxidimik 500 tonsinik avammut tunisaqartarnerminit ukiut 37-t ingerlaneranni 140 milliarder koruunit missaannik imaluunniit ukiumut 3,75 milliarder koruunit missaannik iluanaaruteqartassalluni, Sermitsiaq allappoq.
IA sinnerlugu Inatsisartunut ilaasortaq Mariane Paviasen paragraf 37 naapertorlugu apeqqut aqqutigalugu akileraarutissanik naatsorsuinermut tunngavigineqartunik naatsorsuisimanernik takunnissinnaatitaanissamik qinnuiginnissimavoq.
Naatsorsuutit tunuliaqutaasut
Tamannali Naalakkersuisunit itigartitsissutigineqarpoq inuussutissarsiornikkut isertugaatit, aqutsinermut inatsit naapertorlugu pisinnaatitaaffimmik piginnittumut pineqartumut aningaasaqarnikkut pingaaruteqartut, innersuussutigalugit.
Aalborg Universitetimi aningaasaqarnikkut aqutsinermi professori, Per Nikolaj Bukh, naliliivoq, naatsorsuinerit tunuliaqutaasut politikerinut suliniut pillugu aalajangiisussanut pissarsiarisinnaanngortinneqartariaqartu.
– Pissutsinik isertuunneqartariaqarsinnaasunik pigisaqartoqarsinnaanera ersarippoq. Pissutsilli taamaattut oqalliffimmi oqaluuserisanik isertuussiviusumi assersuutigalugu ataatsimiititaliami matoqqasumik ataatsimiinnermi amerlanertigut akineqarsinnaasussaapput. Naatsorsuinerit taama ittut pisariugaluartut, nalornisoornerlu taakkununnga atatillugu annertugaluartoq, taamaattoq nalornisoorutinik politikerit ilisimasaqarnissaat pingaaruteqarpoq, aalajangiinermi sunik tunngavissaqarnissartik ilisimaniassammassuk.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: