Demokraatit siulittaasuat: Angalaneq sakkortuumik allanngorartoqarfiusoq
Demokraatit siulittaasuata partiip naalakkersuisoqatigiinnut ilaalersimanera peqqissimissutiginngilaa. Kisianni qineqqusaarnissap piviusorsiortuunngitsunik qineqqusaaruteqarluni iluareqqusaarfiuallaalernissaa ernummatigaa
29-nik ukiulik Jens-Frederik Nielsen qaammatit arfineq-pingasut ingerlaneranni siullermeerluni piffissaqarlualerpoq.
Partiip siulittaasuata inuusuttup sapaatip-akunnerani kingullermi ataasinngornermi naalakkersuisoqatini, Siumut aamma Nunatta Qitornai, nalunaarfigai, Demokraatit Naalakkersuisuni suleqatigiinnermit tunuartut.
Tamanna tassaalerpoq nunatsinni partiit annersaata novembarip naanerani siulittaasut nikinnerisa kingorna qanoq inissisimanera pillugu sapaatip-akunnerini arlalissuarni nalornisimanerup sakkortunerpaaffia. Demokraatit paasilermassuk Siumumi siulittaasoqarfiup nutaap Erik Jensen siuttoralugu naalakkersuisoqatigiit siamasinnerusumik katitigaasut kissaatigigaa, tamanna tassaalerpoq suleqatigiinnerup qimannissaanut takussutissaq, Jens-Frederik Nielsen aviisimut AG-mut nassuiaavoq.
- Tamanna attanneqarsinnaanngitsutut isummerfigaarput; paatsiveerusimaarnermik kinguneqassaaq, Siumup naalakkersuisoqatigiinnut partiinik arlaqarnerusunik ilanngutsitsinissamik kissaataa pillugu oqarpoq.
Amerlanerussutillit siuttuunissaat
Jens-Frederik Nielsen nammineq isumaqarpoq, Demokraatit Siumumut aamma Nunatta Qitornaanut siorna maajimi naalakkersuisoqatigiinnut ilanngukkamilli suleqataasimasut ilumoorfiginnittut tatiginassuseqartullu.
Coronamik unammilligassat tunngavigalugit naalakkersuisunik patajaatsunik ataatsimoortunillu pisariaqartitsineq pissutigalugu Demokraatit partiitut tapersersortaanermiit naalakkersuisoqatiigiinnut ilaalersimapput.
- Coronap atuunnerani naalakkersuisoqatigiit amerlanerussuteqarnissaat pisariaqartinneqarsimavoq, Jens-Frederik Nielsen oqarpoq.
Qaammatini qulingiluani naalakkersuisoqataapput. Jens-Frederik Nielsen nammineq isumaqarpoq, partii 2019-imi Inatsisartunut qinersisoqarmalli arlalinnik akuerititaqarsimasoq. Mittarfiliortiternerit, ingerlatseqatigiiffiit akileraarutaasa appartinneqarnerat, suliffeqarnermut ilanngaat timersornermullu aningaasaliissutit amerlineqarnerat tikkuarpai. Tamatuma peqatigisaanik aalisarneq pillugu ataatsimiititaliarsuup pilersinneqarnera perorsaasullu aningaasarsiaasa qaffanneqarnerat nuannaarutigai.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq:
