Sofie Petersen kuultimik Nersornaaserneqarpoq
Biskop Emerita Sofie Petersen, Kalaallit Nunaanni ukiuni 25-ni biskoppitut atuunnermini angusani pillugit Nersornaammik kuultimik nersornaaserneqarpoq.
Biskopiusimasoq, Biskop Emerita Sofie Petersen kuultiusumik Nersornaaserneqarmat, Inatsisartut siulittaasuat Vivian Motzfeldt nersornaasiisuuvoq. Sofie Petersen ukiorpassuanngortuni biskopitut sullissisimanera pillugu, nunatsinnilu ilageeqarnerup inerisaaqataanera pillugu nersornaaserneqarpoq.
Vivian Motzfeldtip oqalugiummini tunngavilersuutigaa Sofie Petersen biskopiunermini nunatsinni ilageeqarnerup inerisarnerani patajaalluni qitiulluinnarsimanera.
- Ukiuni amerlasuuni atuuffinni suliarisimasatit pingaaruteqarsimaqisut unammillernartorpassuartigut assigiinngitsutigut aqqutinni siumorsimasakkut, ilaatigut ajoqersuinikkut unammillernartutigut ilageeqarnikkullu ingerlatsinermi unammillernartutigut qaffasissumik inissisimasutigut takuneqarsinnaapput, soorlu assersuutigalugu Kalaallit Nunaanni ilagiit naalagaaffeqatigiit iluanni inissisimanerminnik, Vivian Motzfeldt oqarpoq nangillunilu:
- Aammattaaq Kalaallit Nunaanni Naalakkersuisut taarseraattut atuuffigisimavatit, tamanna ukiut ingerlanerini piffissani ilagiit oqqumoorfigisaanni assumoorfigisaannilu, taamaattorli Kalaallit Nunaanni kristumiuussutsimut ilagiinnullu patajaatsumik naleqqersuisuujuarsimavutit, oqarpoq.
Nunatsinni Biskopi arnaq siulleq
Sofie Petersen augustimi 1987-imi palasitut ivertinneqarpoq. Kalaallit Nunaat 1. november 1993-imi ilagiit namminerminnik Biskoppeqarfinngortinneqarpoq, Sofie Petersenilu 1. maj 1995 Biskopinngorluni. Ukiuni 25-ini Biskoppiusimanini 2020-mi nalliussivaa, novemberimilu Biskopitut soraarninngorluni.
Nersornaat kuultiusoq nersornaataavoq ataqqinartoq. Inatsisartut nittartagaanni ilisimatitsissutigineqarpoq Nersornaat kuultiusoq immikkut ittumik nersorneqartussanut ukiumut amerlanerpaamik ataasiarluni tunniunneqarsinnaasoq.
Biskop Emerita Sofie Petersen 1996-imi Kunngikkormiut nersornaasiuttagaannik tunineqarsimavoq Ridder Af Dannebrogitut toqqagaasimalluni, 2001-imi Ridder af 1. Grad af Dannebrogitut toqqarneqarluni, 2002-mi sølviusumik Nersornaasigaasimalluni kiisalu 2014-imi Kommandør af Dannebrogsordenitut toqqarneqarsimalluni.