Borgmesteri Kuannersuit pillugit: Piviusut takutinneqassapput

Kommuni Kujallermi borgmesterip Kiista P. Isaksenip Kuannersuarni aatsitassarsiorniarneq isumassarsiatsialaanersoq pillugu suli qularnaatsumik oqaaseqarsinnaanngilaq.

- Kuannersuit pillugit illersuinngisaannarsimavunga. Suut tamarmik qularnaatsumik ersersinneqarnissaasa tungaanut arlaannaannulluunniit tapersersuinaveersaarpunga, taanna Sermitsiaq.AG-mut oqarpoq.

Borgmesteri aamma aatsitassarsiorfissap avatangiisinut sunniutissai pillugit paasissutissanik amigaateqarpoq.

- VVM pillugu nalunaarusiaq naammanngitsoq isumaqarpunga. Imaassinnaavoq tailingsit aamma flourip thoriummillu imai pillugit nalunaarusiami ilanngussisoqarsimasoq, nalunaarusiamili atorneqarsimasut inuinnarnut paasiuminaatsinneqarsinnaapput.

- Taamaammat ataatsimiisitsinerit ingerlanneqartut pingaaruteqaqaat, innuttaasut apeqquteqarnermikkut teknikkimut tunngasortaannik paasiuminarnerusumik nassuiaanneqarnissaannut, brgmesteri februaarip tallimaani Narsarsuarmi ataatsimiisitseqqaartoqareersoq oqarpoq.

Naalakkersuisut nutaanik taarserneqartartut

Borgmesterip erseqqissaatigaa, aatsitassarsiorneq avatangiisinut, inuussutissanut, nunalerinermut inuillu peqqissusaannut mingutsitsissanngippat ajornavianngitsoq.

- Ulorianartumik aatsitassarsiortoqarnissaanut Kujtaani Siumut kommunilu isumaqataanngisaannarput. Borgmesterinngoramali naalakkersuisunut oqaatigiuaannarpara, aatsitassarsiorfimmi kemiskinut akuiaaveqartoqarnissaanut isumaqataananga.

Naalakkersuisut kommunip isumaanik paasitinneqartuartarnissaat pisariaqarsimavoq, borgmesteri erseqqissaavoq.

- Naalakkersuisut innuttaasunut uagutsinnullu Kujataani najugaqartunut tusarnaartussaapput. Borgmesterinngoramali aatsitassanut assigiinngitsorpassuarnik Naalakkersuisoqartarpoq. Nutaamik naalakkersuisoqaleraangat siusinnerusukkut nalunaarutigisimasakka allatarisimasakkalu naalakkersuisunngortumut nassiuttarpakka, kommunitut qanoq inissisimanerput takutinniarlugu, Kiista P. Isaksen oqarpoq.

Kinguneqaataasinnaasunik paasinnikkusuttoq

Borgmesterip innuttaasunik ataatsimiisitsinerit ingerlanneqaqqamersut peqataaffigisarsimavai. Innuttaasullu Qaqortumi Narsamilu ataatsimiisitsinerni aatsitassarsiorniarneq pillugu erseqqissunik akissutissarsisinnaasimanngillat, Narsami ataatsimiisitsisoqarmat Greenland Mineralsimut ataasiinnarmik apeqquteqarsimavoq:

- Aatsitassarsiorniarnermi avatangiisinut kinguneqaataasinnaasut pillugit arlaannannilluunniit oqaluttuussinnaanngikkutsigut, qanoq ililluta oqaaserisasi ilumoornersut upperissagatsigit?

Taamatut aperimmat tusarnaartut ersaartaassimapput, taakku ilarpassui aappaluttunik aaqanngitsoqarput Uraani Naamiup ilisarnaataanik seqinermik sungaartunik tununiittoqartumik.

Aatsitassarsiorniarnermut akerliusut arlallit Greenland Minerals pasillertarpaat, aatsitassarsiornissap uumasunut, inunnut aatsitassarsiorfissallu eqqaani avatangiisinut kinguneqaatigisinnaasaanik kusassaanerarlugu, paasissutissallu saqqummiunneqaraangata kikkut tamarmik upperinninneq ajorlutik.

Paasissutissat tamarmik paasiuminaattut

Tassani ilaatigut pineqarput sumiiffimmi pujoralaat, thoriumimut toqqorsivissaq aamma qinngornerit ulorianartut aalisakkanut savanullu sunniutigisinnaasaat. DCE-mi arlaannaannulluunniit attuumassuteqaratik ilisimasallit naapertorlugit, suliniutit VVM pillugu nalunaarusiami saqqummiunneqartut malinneqarpata aatsitassarsiorfissaq peqqissutimut kingunerluuteqassanngilaq.

Narsami ataatsimiisitsisoqarmat Nunatsinni Nakorsaanerup oqaatigaa, aatsitassarsiornissaq pillugu paasissutissat pissarsiarisimasani naapertorlugit aatsitassarsiornissaq illoqarfimmi innuttaasut peqqissusaannut ulorianartorsiortitsissanngitsoq.

Aatsitassalerinermi Avatangiisinut Aqutsisoqarfimmi pisortaagallartup Kjeld Svenningsenip innuttaasunik ataatsimiisitsinerni oqaatigisarpaa, aatsitassarsortoqarnissaa akuerineqassappat avatangiisinut atatillugu malittarisassanik aamma kemikaliat imassaannut qinngornerillu ulorianartut annertussusissaannut killissarititaasut pillugit isumaqatigiissutinik Greenland Minerals malinninnersoq pillugu nakkutiginninnerneq Namminersorlutik Oqartussat akisussaaffeqarnertik pimoorullugu ingerlakkaat.