Aatsitassarsiornermik suliniut annertooq tusarniaaffigineqartoq

Naqqiut nal. 04.10: Molybdæn akoorinermut atatillugu atorneqartarpoq, aaqq.

Aatsitassarsiornermik suliniut Malmbjergimi suliniummik taagorneqartoq, pingaarutilimmik angusaqaqqammerpoq.

Tassami tusarniaanerup takussutissartaraa, canadamiut ingerlatseqatigiiffiata Greenland Resources Inc.-ip, piiaanissamut akuersissummik akuersissummut aqqummi alloriarneq siulleq angugaa, tassani molybdænkoncentratinik ukiumut 22.000 tonsinik piiaanissamut periarfissaq anguniarneqarpoq.

- Tusarniaaqqaarneq ingerlatseqatigiiffiup inuiaqatigiinnut piujuaannartitsisumik ingerlatsinermut naliliinermik (VSB) kiisalu Avatangiisinut sunniutinut naliliinermik (VVM) suliarinninnerup naammassineranik ingerlatseqatigiiffiup nalunaaruteqarnissamik pisortatigoortumik kissaateqarneratut isigineqarsinnaavoq, Namminersorlutik Oqartussat tusarniaavimmi taama ilisimatitsipput.

Ittoqqortoormiinit 185 km-sut ungasissusilik

Aatsitassarsiornermik suliniut qaqqaqarluartumiippoq, illoqarfik qaninneq Ittoqqortoormiit Malmbjergimit kujammut kangimut 185 km missaannik ungasissusilimmiippoq.

Danskit station-iat Mestersvig, aatsitassaqarfimmit Malmbjerg-imit 30 km-it missaannit avannarpasitsigisumiippoq, aatsitassaqarfimmiillu inoqarfinni qaninnerpaalluni. Sakkutooqarfik sioqqanik qallikkamik mittarfeqarpoq, timmisartunit B-737/Hercules C-130-init miffigineqarsinnaalluni. Mittarfiup eqqaanit umiarsualivitoqqamut aqqusineqarpoq (Nyhavn), qanga Blyklippenimi piiaavik ammagallarmat bly/zinkimik piiaanermi umiarsualivigineqartarsimasumi, tusarniaassutini tamanna atuarneqarsinnaavoq.

Aatsitassarsiorfik ammasoq aserorterivimmut aqqusinermik 1,5 km-inik takissusilimmik atassusilerneqassasoq, suliniutip nassuiarneqarnerani atuarneqarsinnaavoq. Aammalu:

Ujaqqat suliarineqanngitsunut toqqorsiviugallartumik ilitsiveqarfeqassaaq,

Sullorsuaq 5,5 km-erisut takitigisoq aqqutigineqartassaaq,

Aatsitassat ruujorersuakkut 17 km-erisut takitigisukkut assartorneqartassapput

Sukuluiaaviup tungaanut aqqusineqassaaq

Piiaavimmit piiakkat sukuluiaaviup tungaanut assartornissaat 26 km missiliorpaat.

Sukuluiaanermi sinneruttoq igitassaq (tailings), 28 km-eritut takitigisukkut roojorersuakkoortillugu avannamut ingerlanneqartassaaq Noretimilu katersorneqassaaq, Mesters Vig ukiumut qaammatini sisamani julip oktoberillu akornani sikueqqasarpoq.

- Tamatuma nalaani sukuluiagaq avalaanneqarsinnaassaaq atortussallu tikiunneqarsinnaassallutik, tamanna ilisimatitsissutigineqarpoq.

Molybdænip akia apeqqutaasoq

Aatsitassanik suliniutip ingerlaqqinnissaanut molybdænip akiata qaffannginnissaanik pisariaqartitsisoq naqissuserneqarpoq. Tusarniaaneq sapaatip-akunnerini arfineq-pingasuni ingerlassaaq, tamatuma kingorna tusarniaanermit nalunaarusiaq suliarineqassaaq, oqaaseqaatit apeqqutillu tamarmik ilanngunneqassallutik, kiisalu aatsitassarsiornermik ingerlatseqatigiiffiup nunatsinnilu oqartussat akissutaat ilaassallutik.

Tusarniaanermi 22. februar killiliunneqarpoq.