Nunaqarfimmi aalisakkerivimmik ammaasoqartoq
Nuussuarmi Upernaviup eqqaaniittumi aalisakkerivimmik nutaamik ammaasoqarmat, nunaqarfimmi aalisartut ukioq naallugu nunaqarfimminni tunisisinnaanngorput.
Arctic Fish Greenland A/S-p nunaqarfimmi Nuussuarmi aalisakkerivittaava nutaaq Upernavimmit 150 kilometerit missaannik ungasitsigisumiittoq sisamanngormat tunisassioqqaarpoq.
- Tunisassiorfik nutaaq decemberip aallaqqaataani 2020 tunisassiorsinnaanissaminut piareerpoq, silali unerisimanikuunngimmat aatsaallu massakkut sikummat ippassaq aalisartut siullermeerlutik tunisimmata, ullumi tunisassiorluta aallartippugut. Ullumikkut tunisassioqqaarnitsinni sulisut nutaat 15-it siullermeerlutik sulipput, Royal Greenland naapertorlugu taama oqarpoq Arctic Fish Greenland A/S-imi pisortaq, Frederik Olsen.
Siornatigut Nuussuarmi tunisassiorfiusimasumi qaleralinnik qerisunik 130 tonsinik annertussusilinnik uningasuuteqarsinnaanikuummat quersuit qerititsiviutigisut ulikaaraangata tunisineq unittarpoq.
Sulisut 30-t
- Tunisassiorfiulli nutaap ammarneratigut maanna nunaqarfimmi aalisartut 40-t 45-llu akornanniittut maanna ukioq naallugu nunaqarfimminni tunisisinnaalerput. Sapaatit akunnerini aggersuni Nuussuarmi aalisarneq ingerlallualeriarpat tunisassiorfik paarlagaallutik sulisunik sulisoqalerpat sulisut 30-t sulisorineqarsinnaalissapput, Royal Greenland nittartakkamini allappoq.
Aalisartitseqatigiiffik Arctic Fish Greenland A/S Nuussuarmi aamma Kullorsuarmi aalisartut, kiisalu Royal Greenland A/S-ip piginneqatigiiffigisaat 2017-imi pilersinneqareermat Nuussuarmi tunisassiorfimmik nutaamik pilersitsinissaq 2018-imi aalajangiunneqartoq, oqaatigineqarpoq.
Nuussuaq 181-inik innuttaqarpoq.