Nunatsinnit filmiliaq Hollywoodimi nersornaaserneqartoq
Nunatsinnit filmiliaq naatsoq 'In the Shadow of the Tugtupite' Hollywoodimi filmfestivalimi Independent Shorts Awardsimi arlalinnik nersornaaserneqartoq, ilitsersuisoq oqaluttuarpoq.
Filmiliaq naatsoq Kuannersuarni aatsitassarsiorfiliornissamik ernummatiginninnermut tunngassuteqarpoq, ukiarmilu Nuuk Internationa Film Festivalimi takuteqqaarneqarluni.
Filmiliamik allattoq, suliarinnittoq ilitsersuisorlu tassaavoq Inuk Jørgensen, filmiliarlu Hollywoodimi festivalimi Independent Shorts Awardsimi maluginiarneqaqqammerpoq.
Filmiliaq festivalimi makkuninnga nersornaaserneqarpoq: Kuulti piviusulersaarummut naatsumut pitsaanerpaamut, bronze killorlugu katiterneranut pitsaanerpaamut, kiisalu ataqqinarnerpaamik eqqartorneqarneranut (honourable mentions) ilitsersuisumut Inuk Jørgensenimut ilitsersuilluarnerpaatut, filmiliamik assiliilluarsimasutut kiisalu nipilersukkanut nipilersoqatigiinnit Puddle of Infinitymit nipilersorneqartunut.
Inuk Jørgensen tusagassiuutitigut nalunaarummi taama paasissutissiivoq.
Nunanit allanit soqutigineqartorujussuusoq
Ilitsersuisoq oqaluttuarpoq, festivalimi nersornaatinik agguaanermut internettikkut peqataasimalluni:
- Ilaatigut Nunani Avannarlerni Piorsarsimassutsikkut Attaveqaat (NAPA), Sverigemi Nordiska Filmskolan kiisalu filmip suliarinerani ikiuussimasut tamaasa qutsavigaakka. Unnuulli ingerlanerani tupaallaatigineqarluinnartoq tassaavoq filmiliap teknikkimut tunnganerusunik aamma nersornaaserneqarnera, nersornaasiinissamik innersuussinerit taakkua siumoortumik oqaatigineqareersimanngimmata, Inuk Jørgensen allappoq.
Filmiliaq Nuuk International Film Festivalimi filmiliat naatsut pitsaanersaattut naliliisartunit nersornaaserneqarpoq, ilitsersuisorlu oqaluttuarpoq, filmi nunanit allanit eqqumaffigineqartorujussuanngorsimasoq.
Ukiumi nutaami Floridami, Norgemi, Sverigemi, Finlandimi, Australiami aamma Belgiami festivalinut peqataanissaq pilersaarutigineqareersoq, Inuk Jørgensen paasissutissiivoq.