Skip to main content

Niviarsiaq Smila kalaallimik allaaserinneqataaffigineqartumik tv-kkut aallakaatitassianngussasoq

Atuakkiaq Niviarsiaq Smila apullu, tunngavigalugu Hollywoodimi tv-kkut aallakaatitassiassap nutaap imassaanut Pipaluk K. Jørgensen allaaserinneqataassaaq. Filmiliortartumut nunani tamalaani tunisassiornissamut nersorinninneq annertooq.

Tuluup ilitsersuisartutut akuerisaasup Amma Asantep HBO-kkut takutitassiamik nuannarineqaqisumik, Handmaid´s Tail-imik, ilitsersuisuusimasup danskip atuakkiortup Peter Høeghip atuakkiaa - Frøken Smillas fornemmelse for sne (NIviarsisaq Smila apulllu) - tv-kkut aallakkaatitassiarissavaa.

Ilitsersuisartutut ilisimaneqratup saniatigut aallakaatitassiornissami soqutinarnerusumik allamik peqataasoqassaaq. Kalaalermi Pipaluk K. Jørgensen tv-kkut aallakaatitassiassap imassaanik allaaserinneqataassaaq. Taassumammi tamanna nuannarilluinnarlugu Sermitsiaq.AG-mut oqaluttuaraa.

- Tamanna ilisimaneqaatigilissavara, ukiummi tallimat-arfinillit ingerlaneranni Kalaallit Nunaat pillugu nunani tamalaani aallakaatitassiortarnermut sunniuteqarniarlunga suliaqarsimavunga, taanna oqarpoq.

Pipaluk K. Jørgensen ukiup ataatsip missaata matuma siorna siunnersortitut ilannguppoq, nunanilu tamalaani annertuumik aallakaatitassiortoqartillugu kalaallit peqataatinneqartartput, tamannali naammanngilluinnartoq, filmiliortartoq isumaqarpoq.

- Oqaluttuaativut nammineq oqaluttuarerusuppavut. Peqataatinniarneqarnera pingaaruteqarluinnarpoq, kalaallinimmik aalajangersimasumik isiginneriaaseq taamaalinngunga allanngueqataaffigisinnaavara, taanna oqarpoq.

Hollywoodimi akuerisaaneq

Pipaluk K. Jørgensenip oqaluttuaraa, tv-kkut aallakaatitassiassaq 1992-imi atuakkiamik nutarteriffiussasoq. Pingaarnertummi inuttaasussaq filmiliortartup ukiumi inunngorfiani inunngorsimasussaavoq, tassalu 1981-imi.

- Taamaammat Kalaallit Nunaanni alliartorsimaninni nammineq misilittakkakka tv-kkut aallakaatitassiami atorsinnaassavakka.

Suliassaq pillugu nuannaaruteqarneup saniatigut, tamanna nunani tamalaani periarfissanik arlalinnik aamma ammaavoq, Hollywoodimimi aallakaatitassirnernissamut nersorinninneq, suliassanik nutaanik pilersitsisinnaasumik cv-mik akuersinertut isigineqarsinnaavoq.

Pipaluk K. Jørgensenimmi nunani tamalaani annerusunik filimiortarnissamik anguniagaqarluni oqaluttuaraa. Suliassap saniatigut nammineerluni aamma filmiliorpoq.

Corona suliniummut aamma sunniuteqarsimasoq

Filmimi, Niviarsiaq Smila apullu, pineqarpoq kalaaleq arnaq Smila Jaspersen, taanna kalaaleq nukappiaraq Københavnimi illup qaavanit aputeqaqisumit nakkarluni toqunera pillugu eqqumiigisaminik paasiniaavoq. Nakkarnerali isiinnarnit takuneqarsinnaanngitsunik allarpassuarnik pissuteqarpoq.

Atuakkiaq saqqummiunneqarami nuannarineqaqimmat arlalinngorlugu naqiterneqarlunilu nutserneqartarsimavoq, 1997-imilu Bille Augustimit filmiliarineqarluni.

Tv-kkut aallakaatitassiassaq allarpassuit assigalugit corona pissutaalluni kinguaattoorfiusimavoq, allaaserinneqataasussallu taamaammat tv-kkut aallakaatitassiassaq qaqugu piariissanersoq oqaatigisinnaanngilaa.  

 

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER