Sukap pania Naalakkersuisunngortoq
Kim Kielsenip Ilinniartitaanermut, Kultureqarnermut Ilageeqarnermullu Naalakkersuisussaq nutaaq sisamanngormat toqqarpaa. Oqaatsitsinnik sorsuutiginnittartoq Katti Frederiksen qinigaanngilaq, taamalu Naalakkersuisutut atuuffimmik isumaginnitsinniarlugu Inatsisartut avaqqullugit pissarsiarineqarluni.
38-nik ukiulik Katti Frederiksen, Ane Lone Baggerip (S) peqqissutsini ilaquttanilu ukkatariniarlugit juulip qaammataata naanerani tunuarnerata kingorna, Ilinniartitaanermut, Kultureqarnermut Ilageeqarnermullu Naalakkersuisunngotinneqarpoq.
38-nik ukiulik Katti Frederiksen 1982-imi martsip aqqaneq-appaanni Narsami inunngorpoq. Ilisimatusarfimmi oqaasilerinermik tusagassiutilerinermillu cand. mag.-itut ilinniagaqarpoq.
Oqaasileriffimmi pisortaavoq, tamatumalu saniatigut atuakkanik naqiterisitsisarfik Iperaq, pingaartumik kalaallisut oqaasilinnut meeqqanut atuakkianik naqiterisitsisartoq ingerlataralugu.
2018-imi Kattis Shop Café ammarpaa, taannali aasaq manna tunisimavaa. Sunngiffimmini maratonertarpoq pingasunillu qitornaqarluni.
Katti Frederiksenip atuagassiami Arnanut qanittukkut allaaserineqarami oqaluttuaraa, suliniuterpassuarminut nukissanik suminngaanniit pissarsisarnerluni.
- Angajoqqaakka inuusuttuullutilli sulisorujussuupput aamma imminnut tatigeqalutik
anguniakkatik anguniartarpaat. Inuupput anguniagaqarusussuseqartorujussuit.
Taamaattumik uannut nalinginnaasutut iinnarpoq inuttut anguniagaqartuunissaq.
Misigisarpunga taakku tunniussaat uanga inuuninni ikumatitsisuusut, Katti Frederiksen
oqarpoq.
Ilaqutariit politikkimik ingerlaqartut
Naalakkersuisunngorutp politikkimi soqutigisaqarnini allanit pissarsiarisimanngilaa. Aanaanaa Suka K. Frederiksen 2014-imi Inatsisartunut qinigaavoq.
Naalakkersuisunut ilaasortaasimavoq aamma ilaatigut 2017-ip tungaanut Namminiilivinnissamut, Nunanut Allanut Nunalerinermullu Naalakkersuisuusimavoq.
Taamaalilluni nunatsinni siullersaalluni Namminiilivinnissamut Naalakkersuisuusimavoq, taamalu tunngaviusumik inatsisissamut isumalioqatigiissitamik pilersitsisuusimalluni.
Suka K. Frederiksen 2017-imi aggustip qaammataani oqqamigut kræfteqartoq paasinwqarpoq, ukiorlu manna juulip 21-ani toqukkut qimagulluni.
Ilinniartitaanermut, Kultureqarnermut Ilageeqarnermullu Naalakkersuisutut atuuffik Ane Lone Baggeri tunuarmalli Karl Frederik Danielsenimit (S) isumagineqarsimavoq.
Katti Frederiksen atuagassiami Arnanut allaaserineqarnera tamaat atuaruk. Iserfigisinnaavat UGGUUNA