- Pisortatut isikkoqarpunga!

- Sunaaffa taamak kusanartigisinnaavunga!

Angutit pingasut arnallu pingasut Dida G. Heilmannimut, Ilisimatusarfimmi Nalinginnasumik perorsaasutut kanditatinngorniartumut taamatut oqarsimapput.

- Angerlarsimaffeqanngitsut misissuisoqarnerata nalaani misissuisoqareerneranilu qanoq imminnut isigisarnerat paasiniarlugu misissuivunga. Isikkuisa allanngortilaarneranni imminnut isigisarnerminnik qanoq allannguisinnaatiginerat misissorpara, Dida G. Heilmann nassuiaavoq.

- Inuttut atugarliuuteqartut isumaginninnikkut ikiorniartillugit ilitsersorniartillugillu qanoq misigisarnersut qanorlu imminnut isigisarnersut paasisaqarfigineqarnissaat pingaaruteqarpoq, taanna oqarpoq.

Nunanit allanit isumassarsiat

Dida G. Heilmann Perorsaanermik Ilinniarfimmi, PI/SPS Nuuk, ilinniartitsisuuvoq, suliffimmilu saniatigut kandidatinngorniartuulluni. Ilaatigut angerlarsimaffeqanngitsut qanoq imminnut isigisarnerat pillugu paasiniaanermini nunanit allanit isumassarsisimavoq.

- Qanoq nammineq isikkoqarnerup pingaaruteqassusia takullugu alutornarluinnarpoq. Angerlarsimaffeqanngitsoq killortillunilu kusanartunik atisalerneqaraangat, angerlarsimaffeqanngitsuunersoq takuneqarsinnaasanngilaq, Dida G. Heilmann nassuiaavoq.

- Aamma arlalippassuarnit misigineqartarpoq, kusanartunik atisalerluni, nutsat iluarsitillugit arnallu pinnersaaserlugit qanoq misigisaqarnartarnersoq. Taamaalilluta inuuserissisarpugut, assersuutigalugulu arlaannut nuannataariarniartilluta kusanartunik atisaleraangatta immitsinnut tatiginerulerlutalu naleqarnerulersittarpugut, Dida G. Heilmann oqaluttuarpoq.

Nalunaaquttap akunnialunnguisa ingerlaneranni allanngorneq

Arnat pingasut angutillu pingasut misissuinermut peqataasimapput. Angut ataaseq angerlarsimaffeqartuuvoq tusilartuullunili, peqataasut sinnerit angerlarsimaffeqanngitsuullutik inuttut atugarliortuupput. Peqataasut tamarmik ulluinnarni Kofoed Skolemiittarput.

Isikkuinik allannguinermi atorneqarput atisat nutaat, nujaleritinneq arnallu pinnersarneqarnerat. Taakku tamarmik najukkami pisiniarfinnit nujalerisunillu tunniunneqarput, najukkamilu cafe pisiniarfillu peqataasunut sandwitchillerlutillu imigassaqartitsipput.

- Allanngornerit takuneqarsinnaallutillu malugineqarsinnaapput. Qanoq isikkoqarneq kisimi pineqanngilaq. Aammali inuttut atugarliortut pisiniarfinni kiffartuunneqarnerat nujalerisunillu isumagineqarnerat pineqarpoq, isumassorneqarput inuttullu akuerineqarlutik. Isikkuat minutsimiit minutsimut kusatsilluni allanngorpoq, Dida G. Heilmann oqarpoq.

- Misissuinermut peqataasut aamma namminneerlutik oqaluttuaraat, allanngornerup imminut naleqartinnerulerlugillu tatiginerulersissimagaat. Ualikkut ittuukulussimariarlutik nalunaaquttap akunneri arfineq-marluk qaangiummata ammanerulerlutillu qiimanerulersimapput. Allanngornerat assini takuneqarsinnaavoq. Tamanna nuannerluinnarpoq, Dida G. Heilmann oqaluttuarpoq.

Dida G. Heilmannip taakku allanngornerat assitigut takusassiaraa. Angerlarsimaffeqanngitsut inuttullu atugarliortut imminnut qanoq isigisarnerannik immikkut suliaqarluni allagaqarpoq, allakkani Ilisimatusarfimmi kingusinnerpaamik 2021-mi upernaakkut illersussallugu naatsorsuutigaa.