Naalagaaffiit Peqatigiit Utoqqarnut ullorititaa ullumiuvoq
Naalagaaffiit Peqatigiit Utoqqarnut ullorititaa, ullumi 1. oktober, Utoqqaat Illersuisuata utoqqaat ornillugit nalliussivaa.
1. oktober tassaavoq Naalagaaffiit Peqatigiit Utoqqarnut ullorititaa.
Kalaallit Nunaanni Utoqqaat Illersuisortaavat, Helene Heilmann, aprilip aallaqqaataani sulilertoq, maanna ukiup affaa sulisimareerpoq.
- Soorunami utoqqaat pilluaqqujumavakka. Eqqaamassavarput inuunerminni misilittakkanik ulikkaarput, inuiaqatigiinni iluaqutaasinnaasunik, Helene Heilmann oqarpoq.
Taassuma maluginiarpaa illoqarfinni nunarfinnilu immikkut malunnartitsiniaasoqannginnera.
Utoqqaat illuanni nalliuttorsioqataasoq
Avannaata Kommuniani silami malunnartitsisoqarpoq, inuit katersuussinnaasut killilersorneqarnerat pissutigalugu.
- Tassani "Ukiumi utoqqatsialak" toqoqqaqatiminut immikkut malunnaatilimmik suliniuteqarsimasoq toqqarneqassaaq, oqarpoq nangillunilu:
- Soorunami uggornarpoq utoqqarnut malunnarnerusumik ullorsiortitsisoqanngimmat, killilersuutit pissutigalugit. Utoqqaat ullorsiortinnissaat aamma inissaminiikkaluarmat, Helene Heilmann oqarpoq.
Taassuma Nuummi utoqqaat illuani najugaqartut ulloqeqqasioqatigai, utoqqaallu peqatigiiffiat Palleq kaffesoqatigalugu.
Ukiuni tullerni utoqqaqarnerulissaaq
Isumaginninnermut Naalakkersuisoq, Martha Abelsen, tusagassiorfinnut nalunaarummini erseqqissarpaa utoqqaat ukiuni tullerni amerlaneruleriartussasut. Taamaammat pingaaruteqarpoq utoqqaat peqqissuutinnissaat.
- Utoqqartatta peqqinnartumik utoqqaliartorlutillu pitsaasumik inuuneqarnissaat pillugu tamatta qulakkeerinneqataanissarput pingaaruteqarpoq. Utoqqaat amerliartornerannut sapinngisarput tamaat piareersarnissarput aamma pingaaruteqarpoq, Martha Abelsen oqaaseqarpoq.
Utoqqaat Illersuisuata, Helene Heilmannip utoqqaat angerlarsimaffimminni ikiorneqartarnerata pitsaanerulernissaanut suliniuteqassalluni, Sermitsiaq.AG-mut oqarpoq.