Siulittaasup tullia siulittaasugaallassaaq
Siulersuisuni siulittaasoq Johannus Egholm Hansen Kalaallit Airportsimi, siulersuisunit tunuarnera pillugu Naalakkersuisut Siulittaasuata Naalakkersuisoqarfia ajoraluartumik ilisimatinneqarpoq, naalakkersuisoqarfik ilisimatitsivoq.
Naalakkersuisut Siulittaasuata Naalakkersuisoqarfia suliffeqarfinnut Namminersorlutik Oqartussanit pigineqartunut akisussaasuuvoq, naalakkersuisoqarfiullu tusagassiorfinnut nalunaaruteqarnermi ilisimatitsissutigaa, Johannus Egholm Hansenip Kalaallit Airportsip siulersuisuinit tunuarnera pillugu ajoraluartumik ilisimatinneqarsimallutik.
- Siulersuisuni siulittaasoq illuatungeriit isumaqatigiinneratigut tunuarpoq, naalakkersuisoqarfik siulittaasuusimasup suliarisimasaanik aamma nersualaarinnittoq:
- Ukiut sisamassaat qiteqqullugu Kalaallit Nunaannut iluaqutaangaarsimavoq Nuummi, Ilulissani Qaqortumilu mittarfittaarnissamut Inatsisartut aalajangiussaata naammassinissaanut ikiuussimalluni.
Sermitsiaq.AG-mit siulersuisut siulittaasuat sooq tunuarnersoq itisiliiffigalugu oqaaseqartitsisoqarsinnaasimangilaq.
Siulittaasup tullia siulittaasunngortoq
Ingerlatseqatigiiffiup siulittaasuata tulliata Christian Bergip siulersuisut sullillugit Kalaallit Airports Holding A/S-imi, Kalaallit Airports International A/S-imi aamma Kalaallit Airports Domestic A/S-imi suliassat tullinnguuttut nangikkallassava.
- Christian Berg Danmarkimeersuuvoq ukiorpaalunnilu Danmarkimi Sverigemilu mittarfiit pillugit suliniutinik suliniutinilu allani annertuuni misilittagaqarpoq. Ullumikkut Sønderborg Lufthavnimi pisortatut sulivoq, naalakkersuisoqarfik allappoq.
Johannus Egholm Hansen Kalaallit Airportsip ingerlatseqatigiiffiutaani pingasuni siulersuisuni siulittaasuusimavoq. Namminersorlutik Oqartussat siulersuisuni ilassortassamik nutaamik siulittaasuusinnaasumillu pissarsiniassapput.
Danskit naalagaaffiat Kalaallit Airports Internationalimik piginneqataagami, ingerlatseqatigiiffimmi siulittaasussatut sassartumik akuersersussaavoq.