Politikkerit sulisullu kattuffii aningaasarsiat qaffaassutissaannik nukingisaarisut
Pinerluuteqarsimasunut inissiisarfinni sulisut aningaasarsiaat ukioq manna siusinnerusukkut qaffanneqarput, aningaasalli sulisut kontuinut suli ikineqarsimanngillat. Tamanna pakatsinarluinnartoq, folketingimi politikkereq isumaqarpoq.
38,4 millioner korunnit ukiunut 2020-miit 2023-mut agguataarneqartussat nunami pinerluuteqarsimasunut inissiisarfinni sulisut aningaasarsiaasa pitsaanerulersinneqarnissaannut qulakkeerinnittussaapput.
Aningaasarsiat qaffaanneqarnissaat pillugu politikkikkut apriilip qaammataanili isumaqatigiissutigineqaraluartoq, pinerluuteqarsimasunut inissiisarfimmi sulisut kontuinut aningaasat suli ikineqarsimanngillat.
- Suliaq arriitsumik ingerlanneqartoq isumaqarpugut, taamaammat Kalaallit Nunaanni suleqatitta aningaasassaminnik pissarsinissaat anguniarlugu oqartussanut nukingisaaruteqarsimavugut, Parnaarussivini sulisut kattuffianni siulittaasoq Bo Yde Sørensen Sermitsiaq.AG-mut oqarpoq.
Naammaginanngilluinnartoq
Sulisut kattuffianni siulittaasup erseqqissaatigaa, isumaqatigiissuteqartoqareersoq aamma oqartussat suliamik suliaqaraluartut sulisut aningaasassatik kingumoortumik pissarsiarissagaat.
Pinerluuteqarsimasunut inissiisarfinni sulisut aningaasarsiaasa qaffaaffigineqarnerat, Kalaallit Nunaanni Pinerluuteqarsimasunut isumaginnittoqarfimmi - tassunga ilanngullugu Nuummi matoqqasumik inissiisarfimmi nutaami, sulisussanik amigaateqarfiusumi amerlanerusunik sulisoqalernissaanut qitiusut ilaattut isigineqarpoq.
Folketingimi ilaasortap Aaja Chemnitz Larsenip (IA) aamma suliap ingerlanneqarnera naammaginngilluinnarpaa:
- Pinerluuteqarsimasunut inissiisarfinni sulisut aningaasarsiaat pillugit politikkikkut isumaqatiginninniarneq apriilip qaammataani naammassineqarpoq, tamatumalu kingorna kattuffiit suliassamik tigusillutik. Taakku isumaqatiginninniarnerat qangali naammassineqaereerpoq, taamaakkaluartoq inissiisarfinni sulisut aningaasarsiami allagaartaanni allannguutinik suli takusaqarsimanngillat.
- Tamanna pakatsinarluinnarpoq, oqartariaqarpungalu suliap taamatut arriitsigisumik suliarineqarnera naammaginngilluinnarlugu, Aaja Chemnitz Larsen oqarpoq.
Aki-Matilda: Suliaq malinnaaffigaarput
Siumut sinnerlugu Folketingimi ilaasortaatitap aamma suliaq malinnaaffigeqqinnaarpaa:
- Paasissutissat Inatsisinik Atuutsitsinermut Ministeeriaqarfimmit pissarsiarisimasavut naapertorlugit, aningaasarsiat qaffaassutissaasa 2020-mi januaarip aallaqqaataa aallarnerfigalugu tunniunneqarnissaat tamaviaarluni sulissutigineqarpoq. Siumumit suliaq malinnaaffigeqqissaarneqarpoq, aamma tamanna pillugu ataatsimiititaliamut apeqquteqartarsimavugut, Aki-Matilda Høegh-Dam suliaq pillugu Sermitsiaq.AG-mut oqaaseqaateqarluni allappoq.
Inatsisinik Atuutsitsinermut Ministeeriaqarfik suliamut atatillugu Sermitsiaq.AG-p saaffiginnissutaanut suli akissuteqanngilaq.