Kim Kielsen KNR-imut isornartorsiuivoq
Naalakkersuisunut siulittaasup Kim Kielsenip KNR-ip allaaserisaa oqaatsit sakkortuut atorlugit isornartorsiorpaa.
KNR-ip allaaserisaa Naalakkersuisunut siulittaasumit Kim Kielsenimit naammagineqanngilaq.
- Pissusiviusut eqqortumik takutinnagit, KNR-ip taama sakkortutigisumik pisuutitsiniarnera isornartoqarluinnarpoq. Tamannalu tusagassiorluarnissamik ersarilluinnartumik malinninnginneruvoq, Kim Kielsen tusagassiutinut nalunaarummi allappoq.
Kim Kielsenip akileraartartut aningaasaataat 688.619 koruunit atorlugit 2015-imit 2019-imut biiliminut aningaasartuutigisimagai KNR ullumi tallimanngornermi allappoq.
Paasissutissat eqquutinngitsut
Namminersorlutik Oqartussat tusagassiutinut nalunaarummi allapput, allaaserisami saqqummiunneqanngitsut eqqortuunngitsut.
- KNR-ip allakkiat eqqortumik atuarsimagunigit, Kim Kielsen-ip atuinera ukiuni tallimani kingullerni 362.142-inik annertussuseqarsimasoq takusinnaasimassagaluarpaa, tusagassiutinut nalunaarummi atuarneqarsinnaavoq.
Kim: Uukapaatitsiniarneruvoq
KNR atuartuminut uukapaatitsiniartoq Kim Kielsen isumaqarpoq.
- Allagaatinik takunninnissamut atatillugu KNR-ip paasissutissat ukioq ataasingajak tigummereerpai. KNR-ip taakkua ulloq Inatsisartut ataatsimiinnerannik ammaanissaq eqqorlugu saqqummiutissallugit aalajangersimammat, tamanna piaaraluni eqqunngitsunik paasissutissiiniarsarinertut imaluunniit uukapaatitsiniarsarinertut ittumik iliuuseqarniarsarinertut isigineqaannarsinnaavoq. Politikkeriunerma nalaani tusagassiuutitigut taama annertutigisumik uukapaatitsiniarsarisoqartoq siornatigut takunikuunngisaannarpara, Kim Kielsen oqarpoq.
KNR ulloq 27. novembari allagaatinik takunninnissamik qinnuteqarpoq, ulloq 3. januar 2020 paasissutissat ukiunut qulinut tunngasut KNR-imut tunniunneqartut Namminersorlutik Oqartussat ilisimatitsivoq.