Assit: Uuliaarluartoqarnissaanut sungiusartut

Uuliaarluartoqassangaluarpat saliinissamut assiaqut puttasartoq atugassaq, 300 meterisut takissuseqartoq, Nuup Kangerluata paavani Illersornissaqarfimmit aamma Greenland Oil Spill Responsemit pingasunngornermi misilinneqarpoq.

Under øvelsen blev en 300 meter lang flydespærring lagt ud i havet og sejlet i formation af et assisterende skib af Holdet fra Greenland Oil Spill Responce samt en gruppe frivillige - Leiff Josefsen

Kathrine Kruse

tallimann 25. sep 2020 15:22

Annonse

Greenland Oil Spill Responsemi sulisut marluk aamma nammineq kajumissutsiminnik suleqataasartut, kiisalu sakkutuut umiarsuaanni Tritonimi aamma Lauge Kochimi sakkutuut umiartortut arlallit imaani uuliaarluartoqassangaluarpat saliniissamut atortussat nutaat, Greenland Oil Spill Responsep Namminersorlutik Oqartussanut isumaqatigiissuteqareernerata kingorna Arktisk Kommando sinnerlugu toqqorsimatillugillu aserfallatsaaliugai, marlunngornermi aamma pingasunngornermi misilerarneqarput.

Atortut

Illersornissaqarfiup containerit tallimat uuliaarluarnermi saliinissamut atortunik imallit tallimat pigai.

Saliutit ataatsit 10 fods containerinut sisamanut poorsimapput:

Containerit pingasut, tamarmik 200 meterisut takitigisunik assiaqutinik puttasartunik imallit (katillugit 600 meterit).
Containeri ataaseq uuliaarluernermut katersuummik, atortunillu allanik imaqarpoq.
Aamma atortut allat, soorlu uuliarluernermut katersuivik ilaalu ilanngullugit.
Atortut tamarmik KNUD RASMUSSEN-itut aamma THETIS-itut angissusilinni atorneqarsinnaapput.

Umiarsuaq alapernaarsuut Lauge Koch Greenland Oil Spill Responsemit nammineq kajumissutsiminnik suleqataasut sisamat peqatigalugit atortussanik nutaanik pingasunngornermi misiliimmat Sermitsiaq.AG najuuppoq.

Sakkortuvoq ilikkagaqarnarlunili

- Ilaatigut nukkiornalaarsinnaangaluarluni ilikkagaqarnarpoq, Akitsinnguaq Ina Olsen, Greenland Oil Spill Responcemi nammineq kajumissutsiminik suleqataasoq oqaluttuarpoq. (Nammineq kajumissutsiminnik suleqataasut: Sungiusarnerminni imaluunniit ilinniartitaanerminni aatsaat aningaasarsisarput, sillimasuunertilli aningaasarsissutigisarnagu, aaqq.)

Sungiusarnermi assiaqut puttasartoq 300 meterisut takussuseqartoq imaanut siaarneqarpoq, taannalu umiarsuarmit allamit najuulluni ikiuuttumit ammalungajattunngorlugu inissinneqarpoq, tamatuma kingorna uuliaarluarnermut katersuutissaq imaanut singinneqarpoq misilinneqarlunilu.

- Pikkunalaarpoq, kisianni misilillugu ilikkagaqarnarluni, Jørgen Henriksen, Greenland Oil Spill Responsemi aamma nammineq kajumissutsiminik suleqataasoq, aatsaallu sungiusarnermik misileeqataasoq, oqarpoq.

Namminersorlutik Oqartussat aamma Illersornissaqarfik Nunatsinni imaani mingutsitsisoqarnissaanut sillimaniarnermut annertuusaarniarlutik isumaqatigiissuteqartuupput.

GOSR pillugu

Cairnip 2012-imi misileraalluni qillerineranut atatillugu ingerlatseqatigiiffik 2012-imi pilersinneqarpoq. Cairnip uuliakoortoqarneranut akiuinermut atortuni Namminersorlutik Oqartussanut tunniuppai. Tamatuma kingorna inatsisitigut aalajangerneqarpoq, ingerlatseqatigiiffiit kalaallit imartaanni uuliasiortut tamarmik, Greenland Oil Spill Responsemut ilaasortanngortassasut.

Atortunik sulisinnaaneq

Tamatuma kingorna Greenland Oil Spill Response Namminersorlutik Oqartussanut saliinermut atortussanik toqqorsimatitsiniarluni aserfallatsaaliiniarlunilu isumaqatigiissuteqarsimavoq. Illersornissaqarfik aamma Greenland Oil Spill Responsemi oqarasuaatikkut pigaartoqartitsilerpoq.

- Illersornissaqarfiup Greenland Oil Spill Responsep atortuutai aamma atorsinnaavaat. Isumaqatigiissut najoqqutaralugu aamma sungiusaqatigiissinnaavugut. Tamanna, pingaartumik nammineq kajumissutsimik sulisutta, nuannaarutigeqaat, Klaus Kuch Jensen, Greenland Oil Spill Responcemi pisortaq oqarpoq.

Greenland Oil Spill Responce saliisoqarnissaanut atortunik Nuummi aamma Aasianni talittarfinni toqqorsimatitaqarpoq, taakkualu saniatigut aamma Nuummi Aasianniunerusorlu nammineq kajumissutsiminnik sulisunik 24-nik piareersimasuutitaqarluni, taakkualu Illersornissaqarfimmit pisariaqartinneqassagunik ikiuukkiartorsinnaasutut inissisimapput.

Allaaserisap aallartinnerani sungiusarnermit assilisanik isiginnaarsinnaavutit.

silap pissusaa avatangiisillu inuiagatigiit