Borgmesteri akissuteqartoq: Aningaasassaqartitsivugut, sulisussaqanngilarli

Avannaata Kommuniata innarluutilinnut suliassaqarfik tulleriissaarinermi kinngullinngortinngilaa, susassaqarfimmullu atorneqartussanik aningaasanik amerlanerusunik nassaarniarnissamut piareeqqalluni. Taamatut kommunimi borgmesteri Palle Jerimiassani IA-p isornartorsiuineranut akissuteqarpoq.

Avannaata Kommuniata innarluutilinnut suliassaqarfik tulleriissaarinermi kinngullinngortinngilaa, aamma inuit innarluutillit atugaasa pitsanngorsaaffiginiarneqarnerat kingullinngortinngilaa.

Taamatut erseqqitsigisumik akissuteqarpoq Avannaata Kommuniani borgmesteri Palle Jerimiassen, kommunalbestyrelsimi Inuit Ataqatigiit ilaasortaatitaata qisuariaataanut.

Inuit Ataqatigiit tusagassiorfinnut nalunaaruteqarnermi Avannaata Kommuniata innarluutillit pillugit suliassaqarfiup pingaarnerutinngippallaaraa pillugu isornartorsiuipput.

- Innarluutillit pillugit suliassaqarfimmik pingaarnerutitsinnginnerarneqarnerput ilumuunngilaq. Tamanna akisussaaffigaarput, soorunami aamma pissutsit pitsanngorsaaffginiarlugit sapinngisannguatsinnik iliuuseqassaagut. Suliassarli kisimiilluta kivissinnaanngilarput, borgmesteri Palle Jerimiassen erseqqissaavoq.

Taassuma oqaatigaa, kommuni 2020-mut missingersuutimini innarluutillit pillugit suliassaqarfimmut 94 millioner koruuningajalluinanrnik immikkoortitsisimasoq. Peqatigitillugu Qaanaami tummeqqiornissamut pisuinnaallu ikaartarfissaannik sanannissamut millionit aappaat avillugit immikkoortitsisimalluni.

- Taakkuli suliarineqarnissaanut sulisussanik amigaateqarpugut, borgmesteri oqarpoq.

Sulisussanik amigaateqarneq

Palle Jerimiassenip tusagassiorfinnut nalunaaruteqarnermi nassuiaatigaa, Avannaata Kommunia innarluutillit pillugit suliassaqarfimmi sulisussanik amigaateqartoq. Sulisut saniannut ingilluni ilinniartinneqarput, aamma innuttaasut innarluutillit qanoq pitsaanerpaamik sullinneqartarnissaat eqqarsaatigalugu pikkorissartitsisoqarsimavoq.

Amerlasuutigut sulisut allamik suliffittaartarput, taamaalilluni sulisunik allanik ilinniartitsilluni aallaqqaataaniit aallartittoqartarluni.

- Sulisut sulisoriinnarnissaannut politikkeqarpugut, taamaakkaluartoq sulisut sulisoriinnarniarnerat ajornartupilussuuvoq imaluunniit Qaanaami sulisussanik piginnaasalinnik pissarsiniarneq ajornartupilussuuvoq, Palle Jerimiassen nassuerpoq.

- Kommunalbestyrelsi peqataarusuppat aningasanik amerlanerusunik immikkoortitsisinnaavugut. Tamatumali ajornartorsiut aaqqiiffigisinnaanngilaa. Aningaasassaqartitsereerpugut, inuilliuku sulisinnaasut amigaataasut, Palle Jerimiassen naggasiilluni oqarpoq.

Isornartorsiuineq sakkortooq

Tusagassiorfinnut nalunaarummi allami Avaannaata Kommuniani borgmesterip Palle Jerimiassenip, Tiliumit meeqqat immikkut pisariaqartitsisut pillugit isornartorsiutigneqartoq akissuteqarfigaa. Taassuma erseqqissaatigaa, kommunimit meeqqat immikkut pisariaqartitsisut puigorneqarsimanngitsut, meeqqallu pineqartut atugaannik pitsanngorsaaniarluni sulisoqartoq.

- Qaanaaginnarmi meeqqat immikkut ittunik pisariaqartitsisut qulingajannik amerlassusillit malittareqqiiffigalugillu suleriarnissamut pilersaarusiuullugillu meeqqat inuusuttullu pillugit siunnersuisarfimmut MISI Avannaa-mut innersuullugit suliniuteqarfigineqarput, Jerimiassen oqarpoq.

- Suliniarnitta ersersippaa ajornartorsiutinik eqqartuinissamut qununngilluaasartugut aammalu meeqqat immikkut pisariaqartitsisut ataasiakkaat qanoq ikiorneqarlutillu ikorfartorneqarnissaat pillugit eqqartuisartugut.

Powered by Labrador CMS