Borgmesteri Tiliup nalunaarusiaa pillugu: Ajornartorsiutit uanga borgmesterinngunnginni pilersimapput
Avannaata Kommuniani borgmesterip Qaanaami innarluutillit pillugit suliassaqarfimmi annertunik unammilligassaqartornera akuersaarpaa, isumaqarporli kommunip suliassaq kisimiilluni aaqqiiffigisinnaanngikkaa.
Qaanaami taassumalu nunaqarfiini Siorapalummi Savissivimmilu innarluutillit pillugit suliassaqarfimmi annertuunik unammilligassaqartoqarnera Avannaata Kommuniata kisimi ajornartorsiutiginngilaa. Taamatut oqarpoq Avaannaata Kommuniani borgmesteri.
- Aap, taamatut inissisimasoqarpoq. Nalunaarusiaq atuarsimavarput, aamma Tilioq inuillu innarluutillit illersuisuat ataatsimeeqatigisimavavut. Oqaatigissavaralu unammilligassat ajornartorsiutillu nalunaarusiami saqqummiunneqartut akuersaarakkit. Taakku atuunnerat miserratiginngilara, Avannaata Kommuniani borgmesteri Palle Jerimiassen Sermitsiaq.AG-mut oqarpoq.
- Tilioq kommuniita unammilligassaanik misissuisimanera, erseqqissaasimanera eqqumaaffiginneqqusineralu pillugit qujaffigerusuppara. Taamaalilluta tamattaalluta suliassamik aallartitsisinnaanngorpugut, taanna oqarpoq.
Nammatassat kusanaattut
Palle Jerimiassenip oqaatigaa, unammilligassat pineqartut Qaasuitsup Kommunerisimasaanit nammatassiissutit ilagigaat.
- Kommuniusimasup unammilligassarpassuit pilersissimasai ukiut pingasut qaangiutereeraluartut aaqqiiffiginiarlugit suli sorsuuteqarpugut. Aaqqiiffigineqarnissaannut piffissarujussuaq atorneqartariaqarpoq. Maannali najoqqutassaqalerpugut, Palle Jerimiassen oqarpoq.
- Inuit innarluutillit tapersersorniarlugit sapinngisatsinnik iliuuseqarpugut. Sulisussanilli piginnaasalinnik amigaateqartuartilluta najukkami iliuuserisinnaasavut killeqarput, Palle Jerimiassen nassuiaavoq, erseqqissaatigalugulu sulisussarsiorneq kommunimit ukkatarineqartoq.
Suliassaq tamanit isumagineqartussaq
Borgmesterip Palle Jerimiassenip nassuerutigaa, innarluutillit pillugit suliassaqarfimmi suliassaq kommunip kisimiilluni aaqqiiffiginiarnissaa ajornartorsiutigissagaa. Inuilluunniit innarluutillit pillugit nutaamik inatsiseqalereeraluartoq, kommuni avataanit ikiorserneqanngippat inatsimmik tassannga atuutsitsiniarneq ajornassaaq.
Taanna isumaqarpoq, kommnit tamarmik, Naalakkersuisut, Inatsisartut, Tilioq najukkanilu innuttaasut ataatsimoorlutik innarluutillit pillugit suliassaqarfimmik kivitsisariaqartut:
- Ajornartorsiutit Qaanaaginnarmi atuutinngillat. Sineriammi sumiiffinni allani tamani aamma atuupput. Sullissinerup sapinngisamik pitsaanerpaamiitinnissaa anguniarlugu, inuiaqatigiinni naleqqusaasoqartariaqarpoq. Taamaammat pitsaasuuvoq, meeqqat tamarmik pisariaqartinneqartumik ikiorserneqarnissaat anguniarlugu, Avaannata Kommunia Naalakkersuisullu februaarip qaammataanili isumaqatigiissummik atsioqatigiissimanerat.
Tilioq Qaanaamut angalammalli, kommunip allaffiani sulisut inatsimmik nutaanik, taassumalu sulinermi qanoq atorneqarsinnaaneranik ilinniartinneqarsimapput.
Tilioq Qaanaameereernermini pissutsit ilungersunartut arfinillit, inunnut innarluutilinnut tunngassuteqartut pillugit nalunaaruteqarsimavoq.