Kommuni meeqqerivinni ajornartorsiummik aaqqiissutissarsiorpoq
Kommuneqarfik Sermersooq meeqqerivinni sulisussaaleqisarneq qaangerniarlugu suliniuteqarpoq. Arlalinnilli unammilligassaqarluni.
Nuummi meeqqerivimmi 'Sikkersumi' sulisussaaleqineq pissutigalugu, angajoqqaat ilaat sisamanngormat sianerfigineqarsimapput, meeqqaminnik meeqqerivimmiititaminnik aalleqqullugit.
Sulisunik amigateqartoqartillugu meeqqat ataatsimoortinneqarsinnaapput, imaluunniit angajoqqaat sianerfigineqarsinnaapput meeqqaminnik aalleqqullugit.
- Sulisunik amigaateqarneq pissutigalugu angajoqqaat sianerfigineqarsimapput, meeqqaminnik aalleqqullugit, Kommuneqarfik Sermersuumi ulluunerani meeqqeriveqarnermi pisortaq Nausunnguaq Lyberth Sermitsiaq.AG-mut oqarpoq.
Sulisulli taartaasartullu uteriarpata meeqqerivinni sulisut naammalissapput, taanna erseqqissaavoq.
- Sulisut taartaasartullu akornanni napparsimasoqarsimavoq, coronallu atuunnerani sulisut nuffasersimagunik suleqqusaanngillat, taanna oqarpoq.
Perorsaasunik tallimanik amigaateqartoq
Ulluunerani meeqqeriveqarnermi pisortap ilisimatitsissutigaa, 'Sikkersoq' sulisunik tallimanik amigaateqartoq.
- Oqaatigisinnaavarali sulisussat arlallit inissarsissunneqariarunik sulilertussaasut, taanna oqarpoq, nassuiaatigalugulu meeqqerivik pineqartoq aggustimili sulisussanik amigaateqarsimasoq.
Kommunip tamanna pissutigalugu angajoqqaat oqaloqatigisimavai.
- Kommuni angajoqqaallu sapaatip akunnerani kingullermi ataatsimeeqatigiissimapput, tassani isumaqatigiissutigineqarpoq, sulisunik amigaateqartoqartillugu angajoqqaat sianerfigineqartassasut.
Angajoqqaalli tamarmik tamatumannga isumaqatigiissuteqarfigineqarsimanngillat. Angajoqqaat sisamat sianerfigineqarsimapput meeqqaminnik aalleqqullugit, taanna ilisimatitsivoq.
Angajoqqaalli ilaasa angajoqqaanut allanut nalunaarutigisimavaat meeqqat aaneqassasut.
Inissanik pissarsinissamut utaqqisoqartoq
Taassuma oqaatigaa sulisussanik pissarsiniarnermi arlalinnik unammillernartoqartoq. Meeqqeriviit ukiuni kingullerni sulisussanik amigaateqartarsimapput.
- Upernaarli perorsaasut isumaginninnermilu ikiortit inissaannik tunisalersimavagut, sulisunulli inissiat tunniunneqarsinnaasut killeqarmata qaammatini arlalinni inissamik pissarsinissamut utaqqisoqartarpoq. Ajornartorsiutip aaqqiiffisineqarnissaanut piffissaq suli ingerlasussaavoq. Qinnuteqartunik namminneerlutik ineqanngitsunik qinnuteqartoqartarpoq, Nausunnguaq Lyberth nassuiaavoq.
Kommuni meeqqerivinni sulisussat naammattut pigilerniarlugit allatut aamma aaqqiissutissarsiorsimavoq. Perorsaasutummi ikiortitullu ilinniagaqarsimasunik pissarsiniarneq uanmmillernartuuvoq.
- Sulisut inissaqartinneqarnissaat soorunami pingaaruteqarpoq, tamatumali saniatigut sulinermi aningaasarsiassat aamma pilerinartuusariaqarput. Nalunngilarput perorsaasut aningaasarsiagissaarfiunerusunut allanut qinnuteqartartut.
- Taartaasussanik pissarsiniarnermut atatillugu pinerluuteqarsimannginnermut uppernarsaammik aamma meeqqanut pinerluuteqarsimannginnermut uppernarsaammik tunniussisoqarnissaa piumasaqaataavoq, maannakkorpiarlu taartaasartussanik pissarsiniarneq ajornartarluni, Nausunnguaq Lybertht oqarpoq.
Angusaqarluartoqarnissaanik neriuuteqarneq
Perorsaasut aningaasarsiaannut tunngatillugu maannakkorpiaq isumaqatiginninniartoqarpoq.
- Taamaammat perorsaasut aningaasarsiaasa qaffanneqarnissaat neriuutigilluinnarparput, tamatumami malitsigisaanik amerlanerusut meeqqerivinni sulerusulertussaammata. Aamma perorsaasunik amerlanerusunik sulisoqalernissaq anguniarlugu allanik suliniuteqarpugut, pilersaarutilli suut pineqarnersut pillugu ajoraluartumik oqaaseqarsinnaanngilanga, Nausuunguaq Lyberth oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...