Skip to main content

Angajoqqaat: Perorsaasut pitsaanerusunik atugassaqartissigit

Angajoqqaat meeqqerivimmiittuutillit ataatsimoorlutik suliniuteqalerput, meeqqerivinni perorsaasut atugarisaat pitsaanerulersikkumallugit. Ilinniarsimasunik sulisoqarnissaq kissaatigaat.

Angajoqqaat Nuummi meeqqerivimmiittuutillit meeqqatik meeqqerivimmut ullaakkut tunniukkaagamikkit ernumasarput.

Angajoqqaat naapertorlugit meeqqerivinni sulisut ilungersungaatsiarput, sulisunik amigaateqarneq, suliassarpassuaqarneq, taarserartunillu paarlatseqarneq pissutigalugit. Sulisut taarseraannerujussuat angajoqqaanut toqqissisimatitsiunnaarpoq, meeqqammi taama atugassaqartitaanerminni aamma toqqissisimajunnaartarmata:

- Angajoqqaatut misigikkajupparput inuit nalusarluinnatsinnut meeqqat tunniuttariaqartarlugit. Meeqqamut meeraaqqerivimmiittumut qanoq toqqissisimananngitsigissava sulisunit ilisarisinnaanngisanit paarineqarnissaq, sulisummi meeqqap ullukkut atortagai suusut naluai, angajoqqaaqatigiit aperipput.

Inatsimmik unioqqutitsipput

Angajoqqaaqatigiit, Inaluk Heilmannip oqaaseqartuuffigisai, kissaateqarput perorsaasut pitsaanerusunik atugassaqartinneqalissasut. Perorsaasut pitsaanerusunik atugassaqartinneqarpata, meeqqat pitsaanerusunik atugassaqartinneqassapput, isumaqarpoq.

- Meeqqat meeqqanukaannissaat toqqissisimanarunnaavippoq. Nalunngilarput sulisut aalajaallutik sulisut meeqqat pitsaanerpaamik paaqqutarineqarnissaat ilungersorlutik sulissutigigaat, taamaakkaluartoq tamanna naammanngilaq. Sulisullu ima amigartigisinnaasarput, allaat sulisoq ataaseq kisimiilluni meeqqanik 14-inik paarsisariaqartarluni, tassa inatsimmik sulisut amerlassusissaasa ikinnerpaaffissaannik unioqqutitsisariaqartarlutik, angajoqqaaqatigiit allapput.

Angajoqqaat isornartorsiuinerat Kommuneqarfik Sermersuumi meeqqat atuarfiillu pillugit ingerlatsivimmut Sermitsiaq.AG-p saqqummiuppaa:

- Angajoqqaaqatigiit isumaqatigilluinnarpagut Kalaallit Nunaanni meeqqat nalitunerpaanerarmatigit. Taamaattumik meeqqerivinni sulisut amerlanerulernissaat ilungersorluta sulissutigiuarparput - pingaartumik ilinniarsimasunik sulisoqarnissap tungaatigut. Aasaanerani sulinngiffeqareernerup kingorna sulisussaqarnerup tungaatigut ilungersunartumiissimavugut, paarlatsit arlallit ilinniakkaminnik aallartitsisimammata. Perorsaasunilli ilinniarsimasunik atorfinitsitsiortorluta sulivugut, atorfiilli tamakkerlutik suli inuttassarsinngillat, meeqqat atuarfiillu pillugit ingerlatsivimmi pisortaq, Lone Nukaaraq Møller allakkatigut akissuteqarluni ilisimatitsivoq.

Atugarisat pitsaanerulersikkusukkai

Angajoqqaaqatigiit suligasuartussanik pilersitseqqammerput, perorsaasut atugarisaasa pitsaanerulernissaannik suliniuteqartussanik. Perorsaasut akissarsiaasa pitsaanerulernissaat, taamaasilluni meeqqerivinni sulisoqarnerulernissaq kissaatigineqarpoq.

Taakku ilisimatitsipput perorsaasut akissarsiaannut tunngatillugu isumaqatiginninniarnerit ingerlasut soqutigisarilluinnarlugit, ersarissunillu pitsanngorsaasoqarnissaa kissaatigalugu.

- Ilisimalluarparput kommunemi sumiiffinni arlalinni ajornartorsiutigineqareersoq, siunissamilu pitsaanerusumik atugassaqarnissaq anguniarlugu suliniuteqartoqartariaqalerpoq. Aqutsisut kisimik suliaq kivissinnaanngilaat, allaniilli suli qaffasinnerusuniit tapersersorneqartariaqarlutik. Tamanna suli naammassineqarsimarpasinngilaq.

- Perorsaasut inuiaqatigiinni naleqartutut isigineqarsinnaanngippata, akissarsiagissaartinneqarsinnaanngippata pitsaanerusunillu atugassaqartinneqarsinnaanngippata, taava qanoq ilillutik meeqqatsinnik paarsinertik naleqartutut isumaqartutullu isigissavaat? Nunatta pisuussutaanik nalitunerpaanik paarsisut pitsaanerusumik akissarsiaqartinneqalernissaat tapersersorsiuk, angajoqqaaqatigiit allapput.

Borgmester Charlotte Ludvigsen: Meeqqat inuusuttullu peqataatinneqarnerulissapput
Meeqqat inuusuttullu namminerminnut tunngasoqartillugu peqataatinneqarnerulissapput. Meeqqamut ataatsimut imaluunniit inuusuttunut ataatsimoortunut amerlanerusunut tunngasoqartillugu...
Ilungersuussilluartut nersorneqarput
Ukioq manna Ilungersuussilluartunut inunnut pingasunut borgmesteri Charlotte Ludvigsen nuannaangaarluni akissarsititsivoq. Toqqagaasut marluk najuupput ataaserlu najukkamini Tasiilami...
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER