Arsaannermi pissartanngorniunnissat taamaatiinnarneqarput

Oqartussat katersuunnissamummi killilersuinerat, 31. december 2020-mut atuuttoq, pissutaalluni arsaannermi GM-ertoqassanngilaq ukioq manna.

Taamaatitsiinnartoqareersoq arsaattartut kattuffianni KAK-mi siulittaasoq Finn Meinel Sermitsiaq.AG-mit oqaloqatigineqarpoq:

- Maleruagassat allanngortinneqarsinnaannginneri oqartussanit nalunaarfigineqarpugut ippassaq marlunngormat. Taamaattumik timersoqatigiiffinnut nalunaarpugut ukioq manna GM-it ingerlanneqarsinnaanngitsut. Pissartanngorniuttoqarsinnaannginnera pakatsissutigeqaarput.

Siunnersuuteqartaraluartut

Sooq pissartanngorniuttoqarsinnaannginnera paasissutissiiffigineqarsimallutik oqarpoq.

- Peqqinnissaq pissutaalluni taamaatitsineruvoq. Tamanna uggornarpoq, tassami siunnersuuteqartarsimagaluarpugut, soorlu peqqinnissap tungaatigut illersorneqarsinnaasunik siunnersuutinik qaqiliisarsimagaluarpugut, assersuutigalugu iligiit marluinnaat unamminissaat siunnersuutigisarsimagaluarlugu, oqarpoq.

Unammisartut misissorneqarnissaat

GM-imi unammisartut unammersuaarialinnginnermi coronamut misissorneqarnissaat, kiisalu unammersuaareernermi angerlalinnginnermi aamma misissorneqarnissaat siunnersuutigisimagaluarluguttaaq Finn Meinel ilisimatitsivoq.

- Assigiinngitsunik siunnersuuteqartaraluarpugut, taamaattumik ima aalajangertoqartariaqalernera uggornarpoq. Killilersuinerit timersuutinut tamanut atuuppoq, tamanna kikkunnut tamanut eqquulluni. Sungiusaqatigiisitsinissat aamma unammisitsinissat ajornalerput, Finn Meinel oqarpoq.

Timersuummut eqquinerlussaaq

Killilersuinerit pissutaallutik futsalimi nunanut allanut unammisartunut, Nordic Cupimut peqataasussanut, kiisalu silami nunanut allanut unammisartunut, Island Gamesimut aappaagu peqataasussanut, piareersarnerit eqqorneqassasuttaaq KAK-mi siulittaasup oqaatigaa.

- Unammersuaarialinnginnermi piareersarnissat ajornakusuussapput, taamaattumik killilersuinerit pissutaallutik timersuut siunissamut eqqugaanerlussinnaanissaa ernumanarpoq, Finn Meinel oqarpoq.