Tillie sipaarniarneq pillugu: Qinersinermi neriorsuutit maangaannartinneqarluinnarput
Tillie Martinussenip Suleqatigiissitsisuneersup 12 aamma 73 millioner koruuninik sipaaruteqarniarneq, Naalakkersuisut Aningaasaqarnermut Ataatsimiititaliamut akueritinniagaat naammaginngilluinnarpaa.
- Innuttaasut Naalakkersuisoqatigiiit aningaasanik atuivallaarnerat silatusaarnanilu takulluarsaatinik suliniuteqarnerit annaaniarlugit, innuttaasut siullermik ”avatangiisinik illersuinissamut” aamma ”peqqissutsimik siuarnissamut” siullermik biilinut innaallagiatortunut, tupanut nioqqutissanullu sukkoqanngitsunut akitsuutinik akiliisunngornikuupput, Tillie Martinussen tusagassiorfinnut nalunaaruteqarluni allappoq, sipaarniutigineqarniartunullu Sermitsiaq.AG-p ataasinngormat saqqummiunneqartumut atatillugu imatut ilanngussillunig:
Atuaruk: Isumaginnittoqarfik sipaarniarnermit eqqugaanerpaasoq
Atuaruk: Sipaarutiginiakkat 12 mio. koruuniniit 72 mio. koruuninut amerlineqarsimapput
- Meeqqat inuusuttullu, naviartumiittut, atornerluisut, angerlarsimaffeqanngitsut, inuit inissiani ajortuni najugallit aamma atuarfiit ilinniartitsinerlu kiisalu napparsimasut inunnillu napparsimasunik tassanngaannaq angallassisarnerit atornerluineq akilissavaat!
Oqassalluni unigitsi piffissanngorpoq. Univinniaritsi, politikkeri erseqqissaavoq.
Tillie Martinussenip erseqqissaatigaa, Suleqatigiissitsisut pisariaqartinneqartumik sipaaruteqartoqarnissaanut akerliunngitsut.
Susoqartoruna?
- Suleqatigiissitsisunit uppernarsisissavarput sipaarutissat pisariaqarpata akerliunngitsugut, uani suli TAAMAATTOQANNGILAQ, sipaarutissalli atugarissaarnermi pingaaruteqartuni nassaarineqarnatik suliniutinit takulluarssaatinit nassaarineqartariaqarput. Kinguaassiuutitigut atornerluinerit akiornissaannik aamma meeqqat inuusuttullu siunissaat pillugit qineqqusaarnermi qanoq neriorsuutigineqarsinnaappat, taavalu meeqqanutinussuttunullu immikkut suliniuteqarnissaq sipaarniarfigalugu – peqatigitillugulu atornerluinernik katsorsaanerit sipaarniarfigalugit? Nunami tamarmi atuarfiit, ilinniartitsisut atuartullu ingerlaqqeriarsinnaanngillat – ilinniagaqarnerlu siunissarineqarparput, tassanili aamma sipaarniarluta. Susoqartoruna?, Tillie Martinussen aperivoq.
- Naalakkersuisoqatigiit nalunngeqatigiinnissusiat sumiinnersoq apeqqutigaa, oqaatigalugulu Kalaallit Nunaanni tamarmi inuit inissiani aserfallassimasuni, oqoqartuni napparsimalersitsisartunilu najugaqarnerat ilutigalugu Illuutinik ingerlatsinermut Aserfallatsaaliinermullu 10 millioner koruuninik sipaaruteqartoqarnissaanik siunnersuuteqartoqarsimasoq.
- Naalakkersuisoqatigiit bilitsit akikitsut, meeqqat inuusuttullu atugaat pitsaanerusut, sanaartortut siuariartornissaat, akitsuutit qaffannginnissaat akileraarutillu annertusinnginnissaat neriorsuutiginikuuaat. Qanoq taakku maannakkut ingerlappat, Tillie Martinussen aperivoq.