268-it Ilisimatusarfimmut qinnuteqarsimapput
Covid-19-ip ajornartorsiortitsinerata Ilisimatusarfimmi atuartitsineq imaaliallaannaq allanngortippaa. Ilinniartut angerlartinneqarput, angerlarsimaannarlutillu atuartinneqarnerat allartinneqarluni. Maannali nalinginnaasut pilerseqqikkiartuaarneqalerput, inuusuttorpassuit aasap kingorna ilinnialerniarlutik qinnuteqarsimapput.
Inuusuttut maannamut 268-it Ilisimatusarfimmi ilinniakkat ilaannut aggustimi 2020-mi aallartittussanut qinnuteqarsimapput. Ilisimatusarfimmilu ilinniagarpassuit neqeroorutigineqartut ilaannut suli qinnuteqartoqarsinnaavoq.
Rektor Gitte Adler Reimer ukioq kingullertut amerlassuseqapajaartut akuerisaanissaannik naatsorsuutiginnippoq.
Ilinniarnerup aallartinnerata nalinginnaakannersumik pinissaa neriuutigineqarpoq.
– Covid-19-imik pissutsit tamarluinnaasa soorunami alaatsinaappavut – pineqartumilu Kalaallit Nunaanni oqartussat sukkulluunniit maleruagassiaannik malinnilluta. Ilinniarnerup aallartinnissaanut tamatta qilanaartorujussuuvugut, ilinniartunngortorpassuarnillu Ilisimatusarfimmi tikilluaqqusisinnaanissarput naatsorsuutigaarput – pissutsit taamanikkussami atuuttussat ataanni, oqaatigineqarpoq.
Pissutsinut paasinnilluarneq
Gitte Adler Reimer coronamik pissutsit upernaaq ilinniartunit ilinniartitsisunillu qanoq tiguneqarnerannik alutorinnippoq.
– Ilisimatusar k Covid-19 pissutigalugu marsip 18-iani matuvoq, tamannalu ilaatigut atuartitsinerup tamarmiusup namminersuutigalugu ilinniagaqarnermut imaluunniit qarasaasiakkut atuartitsinermut allanngortinneqarneranik kinguneqarpoq – soorluttaaq misilitsinnerit ilarpassuit qarasaasiakkut ungasianit ingerlanneqarsimasut. Ullormiit ullormut atuartitseriaatsitsinnik tassanngaannaq allanngortitsisariaqarsimavugut ... aap, universitetitut suleriaatsitsinnik tamarmiusumik allanngortitsisariaqarsimavugut.
– Kisianni ilinniartut sulisulu tamarmik sulilluarsimaqaat, kikkullu tamarmik paasinninnermik annertuumik utaqqikatajuinnermillu annertuumik takutitsisimapput – tamakkua tamaasa qujamasuutigisorujussuuakka.
Oqartussat isumaginninnerat aamma nersualaarneqarpoq, tamanna nunarpassuarnut allanut sanilliullugu inuiaqatigiit sukkanerusumik ammaqqinneqarnerannik pisinnaanngortitsisimammat, nunanimi allani universitetit aatsaat aasap kingorna ammaqqissapput.
– Oqartussat ajornartorsiornermik ilisimasaqarpalaartumik iliuuseqarfiginninnerisa kingunerisaannik apriilip 27-ani ammaqqissinnaalersimavugut. Tamatuma isumaqarpunga Ilisimatusarfimmi uagut immikkut pisinnaatitaaffilerujussuusutut misigisimassasugut. Nunarsuarmimi sumiiffinni assigiinngitsuni universiteterpassuit suli matoqqapput ammariartuaarnerallu aatsaat ukiaru aallartissalluni. Taamaammat misigisimavunga, aasaanerani soraarummeersunik juunip 23-ni allagartartaartitsisinnaasimanerput pissutigalugu immikkut iluatsitsisimasugut – sungiusimasatsinnit allaanerusumik ingerlattariaqarsimagaluaripput, Gitte Adler Reimer oqarpoq.
Aviisimi ilinniarneq pillugu ilanngussami atuarnerusinnaavutit. Akeqanngitsumik uani atuarsinnaavat.