Assit takukkit: Nipilersortartut Tasiilameersut Danmarkimi nipilersorluni aliikkusersuinersuarmut peqataasut
Winnie Bandikkut Tasiilaminngaanneersut inuusuttut aatsaat taamak amerlatigisut Danmarkimi arfininngormat unnukkut nipilersorlutik aliikkusersuimmata nipilersorput
Winnie Bandikkut Tasiilaminngaannersut Danmarkimi inuusuttunik aatsaat taamak amerlatigisunik Aalborgip Kulturcentret Nordkraftiani arfininngormat nipilersoqattaarmata nunarput sinnerlugu peqataapput.
Inuusuttut taakku tallimat Vaigatikkut nipilersoriaasiat naapertorlugu swing, country rockilu nipilersuutigalugit nipilersortarfissuarmi Royal Stagemi minutsini 20-ni nipilersorput. Namminneq erinniatik tallimat tusarnartitsissutigaat, nuannarineqaqigamillu ersaartaalluarneqarlutik. Nipilersoqattaarnermi rockimik sakkortuumik atuiffiunerusumi nipilersuutit qitikkuminartut Tunuminngaanneersut maluginiarneqarluarput.
Winnie Bandikkunni inuttaapput erinarsortuat Winnie Ignatiussen, bandimut atsiunneqarsimasoq, kiisalu Rasmus Mikaelsen, Aannguaq Jørgensen, Mati Lyberth aamma Anders Kuitse.
Unamminermi ajugaasimasut
- Nipilersortarnerput pimoorupparput sungiusartarfitsinilu sungiusarluartarluta. Tamanna angusaqarfiuvoq, ukiarmi NUIF Nuummi unammisitsimmat ajugaavugut, tumerparpaartartoq Anders Kuitse oqaluttuarpoq. Winnie Bandikkut unammisitsisoqarmat ajugaalluarput taamaalillutillu Aalborgimi nipilersoriarnissamut bilitsinnallutik.
Winnie Bandikkut 2016-imili nipilersoqatigiittalersimapput. Ulluinnarni atuarfimmi Tasiilallu katersortarfiani nipilersortarput.
Winnie Bandikkut festivalimi nipilersornermik saniatigut tallimanngormat ualikkut Aalborgimi Kalaallit Illuanni nipilersorput, ataasinngorpallu Københavnimi Kalaallit Illuani nipilersussallutik, marlunngorpat Tasiilamut uteqqissapput.
- Iluatsitsilluarnerput ukiamut nangeqqillugu unamisitseqqinniarpugut, nipilersortartut Kalaallit Nunaanneersut Danmarkimi nipilersoqattaartitsinermut peqataanissamut periarfissaqarteqqillugit, Carla Villadsen NUIF-imeersoq, Winnie Bandikkut Danmarkimi nipilersoqataanissaannik isumaginnittuusimasoq ilisimatitsivoq.
Aalborgimi nipilersortitsisarneq ukiut tamaasa Ungdomsringimit, Danmarkimi ungdomsklubbinut soqutigisaqaqatigiiffiusumit aaqqissuunneqartarpoq. Nipilersortartut 160-it nipilersorfinni assigiinngitsuni arfinilinni nipilersoqattaarput. Inuit 8.000-it tusarnaariarsimapput.