Issitumi Sakkutooqarfik inuusuttuaqqamik ujaasinermi Islandimut ikiuuttoq
Timmisartoq Hercules sisamanngornermi Islandimut ingerlatinneqarpoq, tamatunilu Issittumi Sakkutooqarfik Islandimi oqartussanut ikiuulluni. Nukappiaraq ajoraluartumik ipisimasoq nassaarineqarpoq
Nukappiaraq inuusuttuaraq Islandimi Eyjafjörðurip eqqaani kuummut Núpámut nakkareersorlu Islandimi oqartussat Issittumi Sakkutooqarfimmit ikioqqupput.
Nukappiaqqap timaa ullumi ullup-qeqqata missaani kuummi qulimiguulimmit Islandimi sinerissamik nakkutilliisoqarfimmeersumit nassaarineqartoq, RUV allappoq.
Tamannali sioqqullugu Issittumi Sakkutooqarfik ujaasinermut peqataavoq.
- Timmisartoq Hercules ilaatigut pilersueqqikkiartorluni, kingoraartissanik juullimullu tunissutissanik nassarluni Station Nordiliarluni ingerlaartoq Islandimut sangutinneqarsimasoq, Issittumi Sakkutooqarfik nittartakkamini allappoq.
Timmisartoq Keflavikimi annaassinniarnermut atortunik usilersorneqarpoq, aqqartartunik annaassiniartartunillu allanik ilaasulerneqarluni, taakkualu Islandip avannarpasissuanut Akureyrimut timmissunneqarlutik tassanilu Islandimi oqartussat ujaasinermik annaassiniarnermillu ingerlatitseqqillutik.
- Annaassiniarnerit imaluunniit silaannakkut imaatigullu sungiusarnerit pineqaraluaraangataluunniit Islandimit suleqatiginnikkumassuserujussuarmik tamatigut misigisaqartarpugut, Issittumi Sakkutooqarfiup pisortaa, generalmajor Kim J. Jørgensen, oqarpoq.