EU-p Nuummi allaffeqalernissaa piumasarineqartoq

EU Kalaallit Nunaanni Savalimmiunilu sinniisoqarfinnik piaarnerpaamik ammaasariaqartoq, EU-parlamentimut ilaasortaq isumaqarpoq

EU Kalaallit Nunaanni najuunnerminik aamma nukittorsaasariaqarpoq Nuummilu allaffimmik ammaasariaqarluni, EU Parlamentimut ilaasortaq isumaqarpoq.

Naluneqanngitsutut USA Nuummi konsulateqarfimmik ammaanissamik sulissuteqareerpoq.

- EU Kalaallit Nunaanni Savalimmiunilu sinniisoqarfinnik piaarnerpaamik ammaasariaqarpoq. Taama Estlandimit Europaparlamentimut ilaasortaq, Urmas Paet, Estlandimi 2005-imit 2014-imut nunanut allanut ministeriusoq, oqarpoq.

- Tamanna nukinginnarpoq, USA-mi Kalaallit Nunaanni sinniisoqarfimmik ammaaqqammerpoq, taamaattumik EU-p Issittumi aamma najuunnissaa aalajangiisuulluinnarpoq, Estlandimiu politikeri nuimasoq isumaqarpoq.

EU-p Kalaallit Nunaanni sinniisoqarfeqalernissaanik piumasaq Bruxellesimi sisamanngornermi oqaloqatigiilluni ataatsimiinnermi, EU-p Issittumi ukiuni tulliuttuni tallimani atuuffigisassaanut tunngasut oqaluuserineqarfigisaanni, saqqummiunneqarpoq. Piumasaqaat ataatsimeeqataasut sinnerinit arlalinnit taperserneqarpoq, ilaatigut Kalaallit Nunaannit Folketingimut ilaasortamit Aaja Chemnitz Larsenimit (IA) aamma Finlandimi nunanut allanut ministeriusimasumit Jari Vilénimit.

- Issittup kommissionip 2020-mut pilersaarutaanut ilaasariaqarneranik kommissionimut nutaamut akuersisitsinissarput pisariaqarluinnarpoq, Vilén, EU-kommissionimi siunnersortaanerusoq EU-llu Issittumut periusissiaanik ineriartortitsinermik ukiorpanni suliaqarsimasoq, oqarpoq.

Issittumut Periusissiap assigiinngiiaartuunissaa pisariaqartoq

Danmarkimit aallartitaq Lars Bo Larsen, Danmarkip EU-mi sinniisoqarfiani ataavartumi suliffeqartoq, erseqqissaalluni oqarpoq, EU-p Issittumi atuuffigisassaminik nassaarnissaa pingaaruteqartoq, pissaanilissuit USA, Rusland aamma Kina tamatumani sunniuteqalerniarlutik eqeersimaartorujussuummata.

- Kisianni periusissiap assigiinngiiaartuunissaa aamma pingaaruteqarpoq. Issittoq ataasiinnaanngilaq, soorluttaaq Kalaallit Nunaat ataasiinnaanngitsoq, aallartitaq Kalaallit Nunaanni illoqarfinni nunaqarfinnilu inuuniarnikkut atugassarititaasut assigiinngitsoorujussuunerat innersuussutigalugu oqarpoq.

Aaja Chemnitz Larsenip Issittup soqutigineqarnera nuannaarutigaa ataatsimiinnerullu kingorna oqaatigalugu, eqqissinerup, sillimaniarnerup illersornissallu Issittumi Siunnersuisoqatigiinniinnaanngitsoq oqallittarfinnili allani oqaluuserineqarnissaat pisariaqartorujussuusoq – taamaattumillu Europamit Kalaallit Nunaannut Issittumullu soqutiginninneq ilassilluarlugit.

Bruxellesimi ataatsimiinneq suliniaqatigiiffimmit Arctic Consensusimit, EU-p Issittullu akornanni suleqatigiinnermik ukiorpanni pingaartitsisimasumit, aaqqissuunneqarpoq.

Powered by Labrador CMS