Peqqarniisaarniarnissamik pasineqartut: Sakkunik pisiniarsarisimagaluartut

Angutit sisamat arnarlu ataaseq illuinnarsuutinik, nipaallisaatinik imassanillu Danmarkimi nunaniluunniit allani sumiunera oqaatigineqanngitsumi peqqarniisaarniarnermut atugassanik pisiniarsarisimasutut aningaasalersuisimasutullu pasineqarput.

Tamanna Københavns Byrettimi Dommervagtimi eqqartuussiviup initaani 27-mi sisamanngornermi ullup-qeqqanut inatsisit tunngaviusut naapertorlugit killisiuisoqarnerani paasissutissiissutigineqarpoq.

Pasineqartut 19-iniit 28-nut ukioqarput. Taakkua tamarmik pinngitsuunerarput.

Pasilliut naapertorlugu decembarip 11-ata – pingasunngornerup – inui 16-it allat peqatigalugit annertuumik suliniuteqarnikkut tigusarineqarfigisaata tungaanut qaammatit ingerlaneranni sakkunik imassanillu pisiniarsarisimagaluarput.

Tigusarineqartunit arfineq-pingasut Københavns Byrettimi sisamanngornermi inatsisit tunngaviusut naapertorlugit killisiorneqassallutik sassartinneqarput.

Pineqartut eqqartuussiviup initaani assigiinngitsuni marlunni sassartinneqerput. Tamatumunnga pissutaavoq sassartitsinerni pasilliutit assigiinngitsunik oqaassertallit pineqarnerat.

Taamaattorli arfineq-pingasut taakkua tamarmik pillaasarnermut inatsimmi peqqarniisaarniarneq pillugu aalajangersakkat sakkortunersaat, paragraf 114, stk. 1-imik taaguuteqartoq, naapertorlugu pasineqarput.

Pasilliutinili immikkuualuttortat tassa assigiinngissuteqarput.

Tigusarineqartut arfineq-pingasut peqqarniisaarniarnissamik pilersaarusiarisaattut ilimagineqartoq pasilliut naapertorlugu iluatsinngitsoorpoq, politiinit tigusarineqarmata.

Eqqartuussivimmi sassartitsineq aallartinnermi kinguninnguatigut sulianut tunngassuteqartumik pissuteqartumik nal. 13-ip tungaanut unitsikkallarneqarpoq. Taamaalinerani illersuisut suliaq sullitaminnut oqaloqatiginnissutigisimavaat. Illersuisut arlallit taamaaliornissamut piffissaqarnerunissamik qinnuteqarsimapput.

Unnerluussisussaatitaasunit piumasarineqarpoq inatsisit tunngaviusut naapertorlugit killisiuinerup sinnera matoqqasumik ingerlanneqassasoq. Eqqartuussisoq tamanna malinniarlugu aalajangerpoq.