Innarluutillit pisuusutut misigisimallutillu kanngusuttarput
Innuttaasorpassuit ukioqqortusereerlutik innarluuteqalersimasut pisortanit ikiorserneqarsinnaatitaallutik ilisimaneq ajorpaat. Innarluutillit illersuisuiata Kommuni Kujallermi angalasimanerminit nalunaarusiaani siullermi tamanna takuneqarsinnaavoq.
- Ukioqqortusillutik innarluuteqalersimasut amerlasuut, aamma inuit amerlasuut innarluutiminnik inuunermi kingusissukkut misigisimasut, inuit tamakku ikiorserneqarnissamut allatulli pisinnaatitaapput, innarluuteqarnerulli nassuiaataa ilisimalersimannginnamikku naluaat ikiorserneqarnissaq tamanna noqqaassutigisinnaallugu, innarluutilinnut illersuisoq Christina Johnsen angalanermit nalunaarusiamini allapoq.
Paasinarsivormi sammisaq eqqartussallugu paqumigineqartoq, innuttaasullu ataasiakkaat innarluuteqarnertik akueriuminaatsittaraat.
Nukillaarnerit
- Inuit ilaasa assersuutigalugu nassuiaatigisinnaasarpaat, ajutoorsimanerup qaratsakkulluunniit aanaartoorsimanerup kinguneranik timimikkut nukillaartarlutik aamma eqqaamannissinnaajunnaarlutillu oqalussinnaajunnaartarlutik imaluunniit atuarsinnaajunnaarlutillu allassinnaajunnaartarlutik. Taamaakkaluartoq innarluutilittut imminnut isigineq ajorput, nalunaarusiami allassimavoq.
Innuttaasut arlallit innarluuteqarnertik pillugu aatsaat siullermeerlutik oqaloqateqarput, innuttaasullu taakku innarluuteqarnertik pillugut nammineq pisuusutut kanngusuttutullu misigisimasartut innarluutillit illersuisuiata erseqqissumik takusinnaavaa.
Tilioq inuit kingusissukkut innarluuteqalersimasut pillugit arlalinnik saaffigineqartarpoq. Assersuutigalugu qaratsakkut aanaartoorrsimanerup assigisaataluunniit kinguneranik eqqarsartaatsikkut timikkullu pisinnaasakillisimasoqartillugu.
- Tilioq isumaqarpoq, innuttaasut taakku ikiorserneqarpiarneq ajortut. Innutaasumut namminermut ilaqutaa sunullu allanngorneq annertuvoq pingaarporlu eqqortumik ikorsernissaat tapersersornissaallu inuunerminni inissisimanertik taanna sungiukkiartuaarsinnaanngortinniarlugu, innarluutillit illersuisuat, innutaasut ilaasa siusinaarluni utoqqaliersiaqalersimanertik pissutigalugu inooqatimik aningaasarsiaannik, ilaqutariit aningaasaqarnerannut artorsaataasumik pinngitsuuisinnaajunnaarsimasut erseqqissaatigalugu allappoq.