Tunngaviusumik utoqqalinersiat ukiortaamit 66 koruuninik qaffassapput
Inatsisinik allanngortitsinerup kingunerissaanik nalornissutiginninneq: Utoqqalinersiallit assigiiaartuunngillat.
Ukiakkut ataatsimiinnerup naajartulernerani akitsuuterpassuarnik atuutilersitsisoqarpoq, utoqqalinersiallilli ukiortaamit utoqqalinersiaminnik qaammammut 66 koruuninik qaffaavigineqassapput, inuussutissanut peqqinnanngitsunut, tunngaviusunulli, akinik qaffaanerit ajornersaannut pakkersimaartitsissutissaminnik.
Aviisi Sermitsiaq taama allappoq.
Inatsisartuni amerlanerussuteqartut 2020- mut aningaasanut inatsimmut peqatigitillugu utoqqalinersianik iluarsiissuteqarput akinut naleqqussaanermut procenti, Naatsorsueqqissaartarfimmit 1,3 procentiusussatut naatsorsorneqarsimasoq, aallaavigalugu.
Januaarip aallaqqaanit iluarsiissutit aqqutigalugit tunngaviusumik utoqqalinersiat 5.141 koruuninit 5.207 koruuninut qaffassapput – katillugit 66 koruuninik.
Kisianni tupat, imigassap sukkullu akii sapaatip-akunnerani kingullermili qaffareerput.
Kalaallit Nunaanni Brugsenimi KNB-mi poortaq Prince 20-nik imalik 82,00 koruuninit 86,50 koruuninut akitsorpoq. Sikaritsi ataaseq taamaalilluni 20 1/4 ørenik akitsorpoq.
Utoqqalinersialimmut sikaritsinik qulinik ullormut pujortartartumut tigusartakkat qaffariaataat 66 koruuniusut tupamit nungunneqassapput.
Tamannali Naalakkersuisut sillimaffigereersimavaat: Sikaritsit poortat qulinik imallit siunissami inerteqqutaalissapput, ukiukitsunit ukioqqortuunillu ussernartorsiortitseqqunagit.
Sulisinnaasoq - sulerusuttoq
Utoqqalinersialllit ukiortaamiit tunngaviusumik utoqqalinersianik 1,3 procentimik iluarsiivigineqassasut Isumaginninnermut Naalakkersuisoq Martha Abelsen ukiakkut ataatsimiinnermi utoqqalinersiaqarnermut inatsimmik allannguinissamut Inatsisartunit tamakkiisumik taperserneqarpoq, taamaalillutillu utoqqalinersiallit utoqqalinersiaminnik ilanngartuiffigineqalinnginnerminni ullumikkornit 100.000 koruuninik amerlanerusunik isertitaqarnerusinnaalerlutik.
Utoqqalernersiat qaffaavigineqarnerat pillugu aviisimi Sermitsiami atuarnerusinnaavutit. Aviisi uani ataani pissarsiariuk: