Kielsen USA-p qujageqqusaarnera pillugu: Naalagaaffeqatigiinnermi suleqatigiinnerput allannguuteqanngilaq
– Nunatta matorsuanut avataaniit isaarissamut USA suli kasuttorpoq, Kalaallit Nunatsinniit pulaartoq tikilluaqquarput kaffisoqatigiillutalu oqaloqatigiinnissarput ammaffigaarput – taamaakkaluartoq naalagaaffeqatigiinnermi toqqammavipput allanngortinneqanngilaq, Naalakkersuisut siulittaasuat Kim Kielsen (S) erseqqissaavoq.
Politikerit ilaat, pingaartumik danskit politikerii ataasialinngillat isumaalunnerminnik saqqummiussillutik, isumaalunnerannut pissutaatinneqarluni Kalaallit Nunaata Danmark tunoriaannaassagaa USA-lu suleqatitut pingaarnertut siunnerfigalugu, periarfissarmi taanna ammarneqarnikuummat.
Aviisi Sermitsiaq taama allappoq.
Taamaakkaluartoq Naalakkersuisut siulittaasuata isumaaluttut eqqissisarpai:
– Uanga upperaara aamma aallaavigaara inuiaqatigiit kalaallit kiffaanngissuseqarlutik nunartik namminiilivitsikkusukkaat, tassungalu tunngatillugu qularinngilara innuttaasut kissaatiginngikkaat nunap allap ataaneereerluni nunap allap ataanut inisseqqinnissaq, taamaattorli nunatsinni nammineq tunngavipput aallaavippullu pilersissallugu kiffaanngissuseqarnissarput aqqutissarigipput. Taamatulli oqareerlunga erseqqissaatigissavara pitsaasumik, nukittuumik aammalu patajaatsumik Damark suleqatigigipput, uangalu aalajangiisuussagaluaruma kissaatigissavara namminiilivereerutta suleqatigiinneq taanna arlaatigut attanneqassasoq, aamma sutigut tamatigut immitsinnut oqartussaaffigilereeraluarutta, aamma taamaappoq nunanik allanik, pingaartumik USA-mik suleqatiginninnerput annertusarsimagaluarutsiguluunniit, Naalakkersuisut siulittaasuat Kim Kielsen (S) oqarpoq.
Kielsenip taamatut oqareerluni ilanngullugu oqaatigaa nammineq iluarisimaarini Danmarkip ataqqillugulu akuerinikuummagu Kalaallit Nunaata namminiilivikkusunnera.
Aviisimi Sermitsiami atuarnerusinnaavutit. Aviisi uani ataani pissarsiarisinnaavat: