130 millioner koruunit inuttassaqartinneqanngitsut

Vækstfonden aamma Greenland Venture Kalaallit Nunaanni suliffeqarfinnit soqutiginartorpassuarnut tunngatillugu saaffigineqarsimagami aningaasatigut tapiissutigisinnaasaminik ulikkaarpoq. 130 millioner koruuninik suli sulilersinneqarsimanngitsunik peqarpoq

Vækstfonden aamma Greenland Venture ukiut ingerlaneranni 70 millioner koruunit missaannik aatsitassarsiornissanut marlunnut kingullermillu Nuummi nutserinermi quersuaqartitsinermilu suliffeqarfimmut Usisaammut aningaasaliissuteqarsimavoq.

Vækstfondenimi pisortaq nutaaq Rolf Kjærgaard aamma Karsten Høy Greenland venturemeersoq isumaqarput, suliffeqarfiit aamma taamak amerlatigisut ineriartortinneqarnissaannut ukiuni aggersuni millionerpassuarnik tapiissuteqarsinnaaneq naatsorsuutigineqarsinnaasoq.

Suliffeqarfinnut tapiissuteqariaaseq nutaaq

2018-imi septembarip qaammataani ministeriuneq Lars Løkke Rasmussen, Kalaallit Airports Internationalimut timmisartoqarfilionermulllu peqataanissaq pillugu naalagaaffiup isumaqatigiissuteqarneranut atatillugu Kalaallit Nunaanni inuussutissarsiornermik siuarsaanissamut 200 millioner koruunit nassaralugit tikippoq.

- Aningaasat taakku periarfissippaatigut inuussutissarsiornermik ineriartortitsinermut allatut nutaarluinnarmik tapiissuteqartalernissatsinnut. Siusinnerusukkut qularnaveeqqusiiginnartarsinnaasimavugut. Maanna toqqaannartumik taarsigassarsisitsisinnaalerpugut, assersuutigalugulu Usisaammut tunngatillugu iliuuseqarsimanitsitut piginneqataalersinnaavugut suliffeqarfiullu ineriartornissamik anguniagaqarneranik qulakkeerinnissinnaalerluta, Karsten Høy oqarpoq.

130 millionr koruunit sinneruttut

130 millioner koruunit taakku sinneruttut Kalaallit Nunaanni suliffeqarfinnut allanut suli tunniunneqanngillat, Kalaallillu Nunaanni suliffeqarfiit aningaasalliiffigineqarnissamut periarfissat annerulersimasut tusarsimagaat qularutissaanngilaq.

- Aningaaserivinnik mattussinngilagut. Suliffeqarfiilli aningaaseriviillu akornanni attaveqalersitseqataasarpugut, Karsten Høy erseqqissaavoq, assersuutitullu innersuussutigalugu nutserinermi quersuaqartitsinermilu suliffeqarfik Usisaat.

Suliffeqarfimmik allilerinissamut 20 millioner koruuninik aningaasaliissuteqarnitsigut, suliffeqarfiup Nuup umiarsualiviani qullersaqarfissaminik quersuassaminllu sanaartornissamik pilersaarumminut sinneruttunik 80 millioner koruuninik aningaasaliinissamut naammassinnissinnaanngorpoq.

Ilaqutariit suliffeqarfiutitsialaat

- Usisaat suliffeqarfitsialaavoq aningaasaliiffigisinnaasarput. Suliffeqarfiup nukittoqqutigisimavaa ilaqutariit naleqartitaat naapertorlugit ingerlanneqarsimanini, suliffeqarfiullu nukittuumik ingerlanneqarsimanera takusinnaavarput, Karsten Høy oqarpoq. Rolf Kjærgaardip aamma pingaaruteqarnerarpaa, suliffeqarfiup innuttaasunut akisussaaffeqarnerminik sulisorpassuarminut inuiaqatigiillu sinnerinut takutitsimanera.

Powered by Labrador CMS