Sulinngiffeqannginnermi meeqqat peqatigineqanngikkaata Avannaata Kommunia kinguneqartitsisalerusuppoq
Siunnersuutigineqarpoq decemberi qaammat akiligassiisoqassasoq pilersuisunut ukiup ataatsip iluani meeqqaminnik sapaatit akunnerini sisamani feeriaqatigisimanngikkunikkit.
Erseqqissaaneq: Oqaluuserisaq ataatsimiititaliamit peerneqarmat oqaluuserisaq kommunalbestyrelsimit oqaluuserineqanngilaq
Angajoqqaat sulinngiffeqannginnerminni meeqqatik peqatigisariaqarpaat.
Taamaattoqanngippat Avannaata Kommunia kinguneqartitsisalerniarpoq.
Decemberi qaammat akiligassiisoqassaqsoq pilersuisunut ukiup ataatsip iluani meeqqaminnik sapaatit akunnerini sisamani feeriaqatigisimanngikkunikkit, tamanna kommunimit siunnersuutigineqarpoq. Taanna kommunalbestyrelsip marlunngormat eqqartortussaagaluarpaa, oqallisissiarli kinguartinneqarpoq misissuisoqarnissaa pisariaqartinneqarmat.
Allannguuteqartoqalersinnaavoq
Ilulissat Kommuniani politikkikkut aalajangiussaavoq, pilersuisuusut ataatsimoorlutik sulinngiffeqassasut sapaatit akunnerini sisamani ukiup ataatsip iluani ukiumut qaammammi ataatsimi akiliuteqannginnissaq anguniarunikku.
- Qaasuitsup Kommuniani piumasaqaat taanna ingerlateqqinneqanngilaq taamaasilluni pilersuisut tamarmik december qaammammut akiliutissaq ukiut tamaasa tigusanngilaat, meerartik sulinngiffeqarnermi ilagisimagunikku ilagisimanngikkunikkuluunniit apeqqutaanani, siunnersuummi ilaatigut atuarneqarsinnaavoq.
Meerarpassuit feriaqataatinneqartanngitsut
Peroriartornermut Ingerlatsivimmi Ulluunerani Neqerooruteqarfimmiit saaffiginnissutit arlallit tigusarsimavaat, meeqqat arlaqartut angajoqqaamik sulinngiffeqarnerini peqatigisarsimanngikkaat.
- Meeqqat taakkua tusarlugulu takusarpaat, kammalaataasut feeriartut, tamannalu meeqqanut taakkununnga annernartuuvoq angajoqqaatik peqatigalugit feeriaqataasannginnamik. Allaammi pilersuisoqarpoq feeriartartunik meeqqaminnut nuannersumik misigititsisaratik, siunnersuummi atuarneqarsinnaavoq.
Aalajangernissaq kinguartinneqarpoq
Siunnersuut akuerineqarsimasuuppat decemberi qaammat akiligassiisoqassasoq pilersuisunut ukiup ataatsip iluani meeqqaminnik sapaatit akunnerini sisamani feeriaqatigisimanngikkunikkit.
Ilaqutareeqarnermut Ataatsimiititaliap meeqqeriveqarnermut akigititassanik allannguinissamut tunngavilersuutaasa amigarineqarnerat Aningaasaqarnermut ataatsimiititaliap eqqartugassamik oqaluuserisassanit peersineranut peqqutigineqarpoq aammalu oqaatigineqarluni kommunalbestyrelsimi eqqartorneqassappat minnerpaamik aningaasatigut kingunerisinnaasai misissuivigineqartariaqartut.
Taamaasilluni meeqqeriveqarnermut akit maannakkutut annertussuseqarlutik allannguuteqanngillat.