Innuttaasut naliliinerat: Akitsuusiineq ajorluinnarpoq

Akitsuutit nutaat Nuummi innuttaasunit nuannarineqanngivipput. Innuttaasut isumaat tusarniarlugu Sermitsiaq.AG apersuiartorpoq.

Nioqqutissat assigiinngitsut akii pisiniarfinni ullumi nalimmassarneqaleruttorput. Mamakujuttut, cigarettit, immiaaqqat puussiallu nunatsinnut eqqunneqartillutik akitsuuserneqarneranni pisiniarfiit ajunaaruteqannginnissartik anguniarlugu akit iluarsartuutilereerpaat.

Nuummi innuttaasut arlallit tupaallaatigaat siunnersuut Inatsisartuni ippassaq saqqummiunneqarlunilu akuerineqartoq.

Innuttaasut naammaginngilluinnarpaat akitsuutit aqqutigalugit pissaqarnerusut suli iluanaartussaanerat.

Otto Eugenius:

- Tupaallannareqaara tassanngaannarujussuaq taamaaliortoqarmat. Sivisunngilaq kingullermik taamaalioramik, aamma massakkut tupigivara juullilersorsuaq taamaasiormata. Meerartagut eqqarsaatigissagaanni allaanngiivikkamik mamakujuttussaannik arsaagaaginnartut. Pisiniarfinnut ippassaq alakkarterivunga, kisianni sioraasat nungoreersimagamikkit. Alakkarterininni sioraasarsiniarpassuit mamakujuttusiniarpassuillu takuakka.

Else Thorsen:

- Pujortarneq ajorpunga aamma imerneq ajorpunga. Kisianni mamakujuttut! Ilaa, meerarpassuaqarpunga aamma ernutarpassuaqarpunga, taakkulu juullimi mamakujuttussaqartikkusuppakka, maannakkut kisianni ernumavunga mamakujuttunut akissaqassanngissoralunga, førtidspensioneqarama. Eqqarsarpunga: Tassa juullikkunni mamakujoqarpiassanngilagut? Massakkorpiaq akitsuusiinerat assut kusanaappoq, taanna uanga akuersaarsinnaanngilara. Uagunaasit eqqugaavugut. Meeqqanaasiit eqqugaapput, aamma nalliuttuniinnaq mamakujuttutortaraluarunilluunniit.

Gerth Sigurdsen:

- Ingasappallaaqaaq, pissutigalugu naalakkersuisut imminnut tunisinnaagunik taamarsuaq, sooq taava akitsuutinik taamarsuaq akitsuissappat? Tupigusuutigilaarpara sooq imminnut salliutinnersut. Matoqqavallaarujussuarput inuiaqatigiinnillu sullissinerat naammaginarani. Qulaatiinnarluta aqutsinerat kusananngilaq.

Lise-Marie Andreassen:

- Imigassanut tupanullu akitsuusiinerat ajorinngilara. Mamakujuilli puussiallu taamaasiorneqarnerat isumaqatiginagu, pisariaqarsorinngikkaluarparaluunniit. Inuiaqatigiit peqqinnerulernissaat eqqartorpaat, kisianni pinngitsaalillugit peqqinnerulertoqarsinnaanngilaq. Peqqinnerunissaq inuup nammineerluni aalajangertussaavaa. Inuttaasut peqqinnerulersinniarlugit pinngitsaaliiniartoqarsinnaanngilaq, nammineruna qinigassaq.

Iluuna Reimer:

- Isumaqataanngilanga. Inuiaqatigiit ikittunnguuvugut, affaasa missaat aamma ilinniarsimasuunngillat. Innuttaasut affaasa missaat pissakinnerusuupput, taakkuuppullu eqqorneqartussat. Mamakujuttut eqqarsaatigalugit, juullilersorsuarlu, tassaapput meeqqat aamma pissakinnerusut meerai, taakkuupput eqqorneqarnerpaasussat.

Dea Frederiksen:

- Isumaqatiginngilara. Iluanaaruteqartussaapput akitsuutininngaanniit. Kisianni soorlu uagut ilinniartut, qaammammusiagut qaffannikuunngillalluunniit. Ilinniartuuvunga, pingasunik meeraqarpunga, kollegianiissinnaannginnamalu inimut nalinginnaasumik akiliisarluta. Allatuulli meeqqat weekendini mamakujuttuserusuttarpakka. Nuannarinngilara tassanngaannartumik taama aalajangertoqarnera.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS