Qulinik ukiulik Afrikami qaqqat portunersaannut qaqisimasoq
Karl Skarregaard Rosagerip Nuummeersup naalagaaffeqatigiit iluanni maannamut inuusunnersaalluni Kilimanjaro qaqisimavaa
Ukiualunni takorluugaasimavoq, kingullermillu tallimanngormat takorluugaq piviusunngortinneqarpoq: Karl Skarregaard Rosagerip qulinik ukiullip Nuummeersup seqernup nuinngilaattaani Kilimanjaro qaqivaa.
Taassuma taamaalilluni naalagaaffeqatigiinni inuusunnerpaalluni Afrikami qaqqat portunersaat 5895 meterinik portussusilik qaqisimavaa.
- Atuarnikuuara, danskeq arnaq aqqanilinnik ukioqarluni naalagaaffeqatigiinni inuusunnerpaalluni qaqqaq qaqisimagaa. Tamannali pissutaanngilaq qaqerusunnitsinnut, Karl Skarregaard Rosager oqarpoq.
- Ukiut pingasut matuma siorna ataatagalu Nepalimi angalatilluta oqaluuserisimavarput, Kilimanjaro qaqissallugu soqutiginassasoq, ukioq manna tamatuminnga periarfissarsivugut.
Kaalillu rekordia qaangeruminaassaaq. Tassami minnerpaamik qulinik ukioqartoqartariaqarpoq qaqqamik qaqisiniaraanni.
Kilimanjaromik qaqisiniarneq imatorsuaq ajornartuunngilaq. Taamaakkaluartoq asuli pisassaanngilaq, qaqisiniarnermi tamaviaarnartuusartoq oqaatigineqartarpoq, qaqisiniammi affaasa missaanniittut kisimik qaqisimavaat.
- Taamatut portutigisumukanermi mianersortoqartussaavoq, tuaviinnarmi qummut ingerlatilluni ajortikkaanni imaluunniit sila allanngoraagat tamatigut utertoqartussaavoq, tamanna qummut ingerlatinnata ingerlaarnitsinilu oqaluuseringaatsiarsimavarput.
Kaali maanna Kalaallit Nunaannukarluni ingerlaarpoq.
- Assoroornarsimaqaat, inuuninnili misigisimasanni pitsaanerpaat ilagivaat, angut inuusuttunnguaq oqarpoq.
Qaarpiaanut qaniniarneq nalinginnaasumik sapaatip akunneranik ataatsimik sivisussuseqartarpoq, orpippassuarniit nunamut naggorluttumut sermilimmut lavatoqartalimmullu. Qaqqap naqqaniit qummukaraanni silap pissusii tallimat assigiinngitsut aqqusaartariaqarput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
