Aki-Matilda: Politiit aningaasarsiaasa aaqqiiffigineqarnissaat pingaaruteqarluinnarpoq

Siumumit folketingimi ilaasortaq Aki-Matilda Høegh-Dam aammaarluni ullumi aningaaaqarnermut ministerimik Nicolaj Wammenimik (Soc) aningaasanut inatsisissaq pillugu isumaqatiginninniaqateqarsimavoq.

Aammaarluni erseqqissaatigeqqippaa, suna salliutinniarnerlugu.

- Pingaarnerparpaavoq politiit inissiisarfinnilu sulisut aningaasarsiatigut atugaasa pitsaanerulersinneqarnissaat, taanna Sermitsiaq.AG-mut oqarpoq.

- Taakkununnga marluusunut tunngatillugu ajornatorsiuteqarpugut. Inissiisarfinni sulisunut tunngatillugu sulisussarsiniarneq annertuumik ajornartorsiutaavoq.

Soorlu siusinnerusukkut oqaluttuarereeripput, Nuummi parnaarussivittaami sulisussanik amigaateqartupilussuuvoq.

- Politiinut tunngatillugu takusinnaavarput, Danmarkimi politiinut sanilliulugu aningaasarsiat assigiinngissutaat pissutaalluni sulisunik attassiniarneq ajornartuusoq, taanna oqarpoq.

Aki-Matilda Høegh-Damip Parnaarussivinni sulisut kattuffiat, Politiit kattuffiat kiisalu Kalaallit Nunaanni Politiit peqatigiiffiat ataatsimiititaliap ataatsimiinnissaanut qaaqqusimavai, tassani aningaasarsiat assiginngissutaat pissutaalluni ajornartorsiutaasartunut isummat saqqummiunneqarput.

- Uannut pingaaruteqarpoq Danmarkimi politiit ajornartorsiutip qanoq ajortigineranik aamma aaqqiissuteqarnissap pisariaqartinneqarluinnarneranik paasinninnissaat.

Aki-Matilda Høegh-Dam folketingimi socialdemokraatit gruppiannut ilaavoq, taamalu aamma gruppit ataatsimiinnerannut peqataasarluni.

- Ataatsimiinnerit aamma matuma qanoq ilungersunartigineranik nassuiaanermut atortarpakka. Tassani aamma ministerinut toqqaannartumik tamatuma oqaatiginissaanut periarfissaqarpunga, taanna oqarpoq.

- Isumaqarpunga paasinnikkiartulertoqartoq, maannalu aaqqiissutissarsisoqassanersoq piffissap isumaqatiginninniarnerillu kisimik takutikkumaarpaat.