Immikkut sammisat 40.000 koruuninik eqquiffigiuk
Kandidatinngorniat Savalimmiut, Kalaallit Nunaat naalagaaffeqatigiinnerluunniit pillugit immikkut sammisallit unamminermut nutaamut maanna peqataasinnaalerput.
Kandidatinngorniartutut immikkut sammisat 40.000 koruuninik maanna pinnassutigisinnaalerpat. Matumani pingaarnertut piumasaqaataavoq immikkut sammisami Savalimmiut, Kalaallit Nunaat naalagaaffeqatigiinnerluunniit allaaserineqassasut, tamatumali saniatigut sammineqarsinnaapput ilinniagassat suulluunniit iluanni pineqarsimasut. Tamanna Danmarkimi ilinniartitaanermut ilisimatusarnermullu ministeeriaqarfiup nittartagaani takuneqarsinaavoq.
Savalimmiut, Kalaallit Nunaat Danmarkilu peqatigiillutik unammisitsipput, tassani suliaqarfiup iluani pitsaanerpaamik immikkut sammisaqarsimasoq toqqarneqassalluni. Ajugaasup aningaasanik eqquinermi saniatigut, immikkut sammisaa tamanut saqqummiunneqassaaq. Nunani taakkunani pingasuusuni tamani ataatsimik ajugaasoqassaaq.
Naalagaaffeqatigiinnermik ilisimasaqarnerulersitsiniarneq
Unamminermut peqataarusukkaanni immikkut sammisaq 2020-mi upernaakkut semesterimi nalilerneqarsimassaaq. Tamatumungali peqatigitillugu 2020-mi aasakkut Ilisimatusarfimmi, danskit universitetiini imaluunniit Savalimmiut Universitetiani ilinniagaq naammassineqarsimassaaq.
- Immikkut sammisat, unammilligassani immikkut sammisaqarnermi misissorneqarsimasuni paasissutissanik nutaarluinnarnik imaluunniit isumassarsiatsialannik aaqqiissutissatullu siunnersuutinik imaqartut ajugaatinneqassapput, saqqummiussami taamatut allassimasoqarpoq.
Unammisitsineq inuusuttut naalagaaffeqatigiinnermut ilisimasaannik siammarteriniarluni suliniutit ilagaat. Siunertamut pineqartumut tassunga danskit aningaasanut inatsisaanni ukiunut sisamanut siorna immikkoortitsisoqarpoq.
- Immikkut sammisami oqaluttuarisaaneq, kulturimut tunngasut politikkikkullu pissutsit sammineqarsinnaapput, aammali nunap sannaanut, takornariaqarnermut allarluinnarnulluunniit tunngassuteqarsinnaallutik.
2021-mi 2022-milu aamma unammisitsisoqassaaq.