Siverth K. Heilmann: Partii ingerlalluarpoq
Atassut ullumi arfininngornermi novemberip qulingiluaani ileqquusumik ataatsimeersuarpoq. Partiip siulittaasua, Siverth K. Heilmann, partiip ingerlalluarnera partiillu aningaasaqarnerata ukiuni kingullerni siumut saatinneqarsimanera, ammaanermi oqalugiutigaa.
Atassutip siulersuisuuneri partiillu immikkoortortaqarfinni aallartitai Nuummi Katuami ullaaq manna qulinut qiteqquttoq ataatsimiissallutik issaapput. Ileqquusumik ataatsimeersuarnissaq februarimi 2020-mi pisussaagaluartoq, ullumikkumut novemberip qulingiluaanut 2019 siuartinneqarsimavoq.
- Tulluusimaarpunga partiip aningaasaqarnera pitsaasumik ingerlalersimammat. Partiimi inuusuttatta ilungersorlutik sulineratigut tamanna anguneqarsinnaasimavoq. Partiillu ingerlateqqinneqarnissaa ajunngitsutut nalilerpara. Tamanna nuannaarutigaara, Siverth K. Heilmann oqalugiummini oqarpoq.
Amigartooruteqarnermit sinneqartoornermut
Siverth K. Heilmannip isertuutinngilaa ukiuni kingullerni partii ilungersorsimasoq. Ataatsimeersuarnermi kingullermi, taassumalu kingorna piffissap ingerlanerani, partiip ilaasortai politikkikkut suliaqartut nuimasut arlallit partiimit ilaasortaajunnaarput. Atassut Inatsisartuni ilaasortaatitaarukkaluarpoq, partiilu tapiissuteqarunnaartinneqarluni.
2018-imillu ukiumut nalunaarusiami atuarneqarsinnaavoq partiip aningaasaqarnera aamma ilungersunartorsiorsimasoq. Kukkunersiuisup nalunaarummi allappaa partiimi aqutsisut ilisimatitsisimasut, avataanit aningaasaliisartut aningaasaliiuarneratigut partii ingerlasinnaasariaqassasoq. Maannali aningaasaqarneq pitsaaneruvoq:
- Ukioq manna ingerlatsinermit sinneqartooruteqartoqarpoq, partiillu nammineq aningaasaatai malunnaatilimmik pitsanngoriaateqarsimapput. Aqutsisut isummernerat avaqqullugu allatut isummernissatsinnut pissutissaqanngilagut, Furesø Revisionimit kukkunersiuisut nalunaarusiaanni allassimavoq.
Namminiilivinnissaq
Partii naalagaaffeqatigiinnermut isumaqataasutut ilisimaneqarpoq. Siverth K. Heilmannillu erseqqissarpaa, partii namminiilivinnissamut sulinissamut taasisitsisoqarmat akuersisimasoq, namminiilivinnissamullu isumalioqatigiissitami ilaasortaatitaqartoq.
- Isumaqanngilarli tassa sukkanerpaamik naalagaaffinngornissaq anguniaripput. Sulili naalagaaffeqatigiinnermik pingaartitsivugut. Atassummiit naalagaaffinngornissamut partiit allat takorluugaqarnerannut suli piareersimanngilluinnarnerput oqaatigisarparput, oqarpoq.
Aammali eqqaasitsissutigaa partiip naalagaaffeqatigiinnermut tunngatillugu isummernera ataatsimeersuarnermi oqaluuserineqassasoq.
Taartissaq
Siverth K. Heilmannip oqalugiummini partiip inuusuttaasa sulianik ingerlatitseqqinnissamut sapinnginnerat tatigalugu oqaatigaa. Siusinnerusukkut nammineerluni oqareerpoq siulittaasutut sassaqqissanani, Aqqalu C. Jerimiassenilu siulittaasussatut innersuussimallugu.
Partiimi siulittaasunngorniartutut allamik sassartoqanngilaq.