Aaqqissuisuuneq innersuussivoq: Aatsitassanut periusissiaq nutaaq ilassilluarneqanngitsoq

Kissaatigisanut allattuiffik pikkunaatsoq, naalakkersuinikkut tutsuiginanngitsoq. Naalakkersuisut aatsitassanut periusissiaat tamanut saqqummiunneqaqqammersoq pillugu Partii Naleqqameersoq Pele Broberg taama oqarpoq. IA isumalluarneruvoq, aatsitassarsiornikkulli siunissami pilersaarutinut Nunatta inissisimanissaata itisilerneqarnissaa amigaatigalugu.

– Periusissiaq eqqarsaatigilluagaananilu suliarilluagaanngilaq. Pineqartoq tassaavoq kissaatigisanik allattuiffik aamma periaasissiaanngilaq siunissamik tikkuussisussaq. Naak-uku Kalaallit Nunaata nunatut aatsitassarsiorfittut isigineqalernissaanut naalakkersuinikkut takorluukkat? Tamakku ilaatinneqanngillat, Partii Naleqqameersoq Pele Broberg oqarpoq, isumaqarnerarlunilu Kalaallit Nunaata sumut siunnerfeqarnissaa pillugu tamakkiisumik oqallinnissamik pisariaqartitsisoqartoq.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Naalakkersuisut politikiat sumut tamaanga sammiveqarpoq. Takornariat perusuppavut aamma tamatuma peqatigisaanik suliniutitut annertuutut pilersaarutit ilanngullugit. Tamakku imminnut ataqatigiinngillat. Takornariartitsineq pinngortitarlu attorneqanngitsoq kissaatigigutsigik, taava tamatuma peqatigisaanik aatsitassarsiortitseqatigiinnut angisuunut pilerisaarissanngilagut. Erseqqissumik pingaarnersiuisoqarnissaa amigaatigaarput tamannalu aatsitassarsiornissamut periusissiami erseqqissumik ersersinneqartariaqarluni, saqqummiunneqartormi sakkukippallaarami.

Nunatta inissisimanera erseqqarluttoq

Pele Brobergip oqaatigaa, periusissiaq taama isikkoqartilluni sunniuteqarnavianngitsoq.

– Suut tamarmik kusanartorujussuupput. Taamaattorli Kalaallit Nunaata aatsitassat sorusunnerai avatangiiserisanut erseqqinngilaq. Iliuuserisarput tassaavoq, aatsitassarsiorneq pillugu saqqummersitsinernut peqataajartorneq. Akerliuniartoqassappat iliuuseqassanngilagut. Attaveqaqatigiinnermik aaqqissuussinernut aatsitassarsiornernut iluaqutaasussanut koruunimik ataatsimilluunniit aningaasaliineq ajorpugut. Pikkorluttutut saqqummiuttarpugut, tamatumalu peqatigisaanik ingerlatsiviit akileraarutaannik qaffasinnerpaanik akiliisitsisarluta aamma nunat aatsitassarsiorfiusut inerisimanerpaat assigalugit royaltymut politikeqarluta. Tamakku imminnut ataqatigiinngillat, periaasissarlu pineqartoq aatsitassarsioqatigiiffinnik amerlanerusunik Nunatsinnukarusulersitsinavianngilaq.

Inuit Ataqatigiinni periaasissamut atatillugu mianersornerulaartumik neriulluartoqarpoq.

– Periaasissami immini pitsaasorpassuarnik siunnerfeqartoqarpoq taakkulu maanna tusarniaassutigineqarlutik. Periaasissap tusarniaassutigineqarnermi nalaani tamakkiisumik ilusissani tigujumaaraa neriuutigaara, tamannalu politikkikkut silittumik tunuliaqutaqarnissaa kissaatiginarluni, taamaalilluta aatsitassarsiornermut atatillugu politikikkut aalajaatsuunerput avammut paasitinniassagatsigu. Periaasissamut aatsitassarsiortitseqatigiiffiit qanoq ilassutissaqarnersut tusassallugit aamma soqutiginartussaavoq, Múte B. Egede oqarpoq.

Najoqqutassaq amigaatigineqartoq

Akileraarutinut royaltymullu periaaserineqartussat allanngortinneqassanersut isummerfigerusunngilai. Isumaqarnerarlunili Nunatta aatsitassanit nunap iluaniittunit pissarsiaqarluartarnissani qulakkeertariaqaraa.

– Aatsitassat ataasiaannarlutik piiarneqartussaapput. Piaarneqarpata inuiaqatigiit kalaallit iluanaarutit ilaannik pissarseqataasussaapput. Taama oqariarlunga aamma isumaqarpunga allat akileraartarnermut royaltymullu politikitsinnut qanoq isummernerat tusaaniartariaqaripput. Najoqqutassarput eqqortoq nanisariaqarparput, taamaalilluta suliffeqarfinnut inuiaqatigiinnullu iluaqutaasussamik pilersitsisinnaaniassagatta.

Aamma Kalaallit Nunaata siunissami qanoq aatsitassarsiorfinngorsinnaaneranut Múte B. Egede amigaateqarpoq.

– Aatsitassanik piiaanermut qanoq iliorluta nammineq iluaqusiisinnaavugut? Suunuku peqataaffigisinnaagivut? Aatsitassarsiornermut atatillugu suut siunnerfigissavavut aningaasaliiffigalugillu? Immaqa takorloorneqarsinnaavoq aatsitassarsiortitseqatigiiffiit ilaannik peqateqalernissarput, taamaalilluta iluanaarutinik pissarsisinnaanerujumalluta. Tamatuma periaasissami tamakkiinerusumik sammineqarnissaa kissaatiginartissinnaavara.

Aviisi Sermitsiaq uani ataani pissarsiarisinnaavat:

Powered by Labrador CMS