Issittumi pinngortitaq sukkasuumik allanngoriartortoq
Ilisimatuut nunallu inoqqaavisa sinniisuutitaat katillutik 50-iusut issittumi uumassusillit assigiinngissitaarnerannik nakkutiginninneq pillugu nunat tamalaat suleqatigiinnerisa qanoq pitsanngorsaaffigineqarsinnaanerat oqaluuseraat
Issittumi pinngortitaq imartarlu sukkasuupilussuarmik allanngoriartorput. Tamatumalu malitsigisaanik nunat tamalaat allanngoriartortunik nakkutiginninnermik suleqatigiinnertik pitsanngorsaaffigisariaqarpaat.
Taamaammat ilisimatuut nunallu inoqqaavisa sinniisuutitaat katillutik 50-iusut, Issittumi pinngortitap imartallu allanngoriartorneri takusinnaasatik oqaluuseriniarlugit ulluni makkunani. Ataatsimeeqatigiinnermi anguniarneqarpoq uumasut, pinngortitami ataqatigiittoqarnera, uumassusillit assigiinngiiaarnerat silallu pissusaata allanngoriartornera pillugit nakkutiginninnermi suleqatigiinnerup qanoq ingerlateqqinneqarnissaanik pitsanngorsaaffigineqarnissaanillu oqaloqatigiinnissaq.
Workshoppi Pinngortitaleriffimmi ingerlanneqassaaq Issittumilu Siunnersuisoqatigiinnit aqunneqassalluni.
Issittumi innuttaasunut sunniuteqartussat
Ilisimatusartartut Issittumeersut 2017-imi nalunaarusioqatigiipput taasaminnik, State of The Arctic Biodiversity Report (Issittumi uummassuseqassutsip assigiinngisitaarnerata killiffia pillugu nalunaarusiaq); tassani Issittumi uumassuseqarnerup assigiinngisitaassusiata allannguuteqarfiunera allaaserineqarluni. Nalunaarusiami ilaatigut Issittormiut uumassuseqarnerup assigiinngisitaassusiata killiffia malinnaaffiginiarlugu siunissami misissuisarnissani suleqataasarnissaannnut siunnersuutit allaaserineqarput.
Inassuteqaatit malitsigisaannik Nuummi workshoppertitsisoqarpoq.
- Issittumi inuuniarneq uumassuseqassutsip allannguuteqarfiuneranit sunnersimaneqartupilussuuvoq. Piniagassat ilaasa pissarsiariniartarnerallu ajornarnerulernikuupput, uumasoqatigiiaat Issittumiittartut avannamut illuariartorput uumasoqatigiiaallu kujasinnerusumeersut takkussuukkiartuaarput. Taamaattumik tamakku allannguutit pillugit ilisimatuussutsikkut siunnersuinerit pingaaruteqarput, Issittumi innuttaasut allannguutinut iliuuseqarnissaminnut aallaavissaqarsinnaaniassammata. Ilisimatusartartut isumaqarput Issittoq tamaaat isigalugu uumassusillit assigiinngisitaarnerat tamakkualu uummaviisa ataqatigiiffigisaanni allanngornissaarsuarnik malunnaateqartunik pisoqalerunavissoq.Taamaattumik allannguutit pisut pisussallu pillugit ataqatigiissumik ilisimatuussutsikkut siunnersuisoqarnissaanik pisariaqartitsineq angisoorujussuuvoq Issittumi tamarmi innuttaasut isummersoqataasinnaaniassammata , Pinngortitaleriffimmit tusagassiuutinut nalunaarummi taamatut allassimasoqarpoq.
Ilisimatusartunit kissaatigineqarpoq, nakkutilliinermi ilisimatusarnermilu angusat issittumi innuttaasunit pissarsiariuminartuunissaasa qulakkeerneqarnissaa.