Parnaarussivik nutaaq sulisussanik amigaateqarluinnartoq

Nuummi parnaarussivimmi nutaami sulisussanit 49-sunit 16-it amigaatigineqarput. Taakkuinnaanngillalli: parnaarussivimmi sulisunit 33-nit 21-t ilinniagaqartuugamik misiligummik sulisuupput.

Parnaarussivinni sulisut kattuffianit taamatut inissisimasoqarnera ilungersunartutut isigineqarpoq.

- Illersorneqarsinnaasutut isigineqarsinnaanngitsumut inissikkiartuaarpugut, kattuffimmi allatsi Rene Larsen Sermitsiaq.AG-mut oqarpoq.

Aningaasarsiat ajornartorsiutaasut

Parnaarussivinni sulisut kattuffiata naammattunik sulisussarsisinnaannginnermut aningaasarsiat pissutaalluinnartutut taavai. Kattuffik naapertorlugu, parnaarussivimmi sulisoq agguaqatigiissillugu 19.975 koruuninik aningaasarsisarpoq, taakkulu Danmarkimi parnaarussivinni sulisut aningaasarsiaannit appasinnerungaatsiarput. Parnaarussivinni sulisut misilittagartuut aningaasarsiarisartagaat 5.000 koruunit sinnerlugit nikingassuteqarput.

- Nalunngisaqarpugut aningaasaqarneq eqqarsaatigalugu suliffiup saniatigut allamik suliffeqartariaqartartunik.

Pinerluuteqarsimasunik isumaginnittoqarfimmi pisortaq aningaasarsiat pisariaqartinneqartunik sulisussarsisinnaannginnermut pissutaanerarneqarnerannut isumaqataavoq.

- Illoqarfinni ineriartorfiusuni, sorlu Nuummi Ilulissanilu aningaasarsiassatut neqerorutigisinnaasavut atorlugit atorfinitsitsisimavugut. Sapaatip akunnerini tamani inunnit soqutiginnittunit saaffigineqartarpugut, ikittuinnaalli atorfinitsinneqartarput. Amerlanerusut piumasaqaatit naammassinngitsoortarpaat imaluunniit aningaasarsiassat qanoq annertutiginissaat tusaraangamikku tunuartertarput, Naaja Nathanielsen, Kalaallit Nunaanni Pinerluuteqarsimasunik isumaginnittoqarfimmi pisortaq oqarpoq

- Ajalusoortoqangajalersoq

Parnaarussivinni sulisut kattuffiata Folketingimi Kalaallit Nunaannut tunngasutigut ataatsimiititaliaq pingasunngormat ataatsimeeqatigaa. Ataatsimeeqatigiinnermi sulisussaaleqineq ernummatigineqarpoq kiisalu sulisut arlallit misillitagaqarpallaanngitsut nunami sakkortuumik pinerluuteqarsimasut isumaginiaraangamikkit tatineqartarnerat ernummatigineqarluni.

- Ajalusuunngajalivippugut, Rene Larsen oqarpoq.

Naaja Nathanielsenip taamatut inissisimasoqarnera ilungersunartuusutut isigigaluarlugu taamatut oqariartortoqarnera isumaqatiginngilaa.

- Parnaarussivinni sulisut kattuffiata Nuummi parnaarussivinni ajalusoortoqalerneranik saqqummiussinera ilisarisinnaanngilara. Sulisulli misilittagaqarpianngitsut amerlavallaarnerannik ernummateqarnerat paasisinnaavara. Tamatumunngali peqatigitillugu erseqqissaatigerusuppara, sulisut suliassaminnik isumaginnilluarmata suliaminnullu pikkorissuseqarmata, taanna oqarpoq.

Immikkoortortaqarfiit ammarneqarsinnaanngitsut

Piortalli isertuutinngilaa, sulisussaaleqineq ajornartorsiuterpassuarnik pilersitsisimasoq.

- Nuummi parnaarussivimmi immikkoortortaqarfeqaroq ammarsinnaanngisatsinnik. Tamatuma kinguneranik pineqaatissinneqarsimasut parnaarussivimmi inissaqalernissaminnut utaqqisut amerliartorput, parnaarussiviit allat ulikkaarnerusarlugit tamanna ikiorsiiffiginiarsarivarput.

Sulisussaaleqinerujussuaq iluarsiiffiginiarlugu parnaarussivinni sulisut tallimat Danmarkimit tikisinneqarsimapput, soorlu aamma parnaarussivinni sulisuusimallutik soraarninngorsimasut arfinillit misilittagaqarnertik atorlugu ikiuuttartut.

- Sulisut ilinniarnermi nalaanni misiliillutik sulisinneqartut ilinniarfittut unammillernartissimavavut. Tamanna Danmarkimit misilittagartuutut tikisitat ikiorsiullugit ilinniartut ilinniartinniarsarineqarput.

- Erseqqissaatigerusuppara Nuummi parnaarussivimmi aaqqiagiinngissuteqartoqartarnera qaqutigoormat, aamma peqqarniitsuliortartut allatulluunniit iliuuseqartartut amerlavallaanngillat. Taamaammat isumaqavippunga isumannaallisaanermut tunngatillugu ajornartorsiuteqarata. Sulisussaaleqineruna ajornartorsiutigigipput, Naaja Nathanielsen naggasiivoq.