Peqataagit: Kujataani angallanneq pillugu misissuineq

Kommune Kujallermi angalaniarneq pillugu Innovation South Greenland misissuivoq

Kujataani angalaniarneq pillugu innuttaasut qanoq isumaqarpat?

Apeqqut akiniarlugu Innovation South Greenland maanna misissuileruttorpoq.

- Nunatta Kujataani najugallit tamarmik kajumissaarpagut peqataaqqullugit aammalu arlaatigut nunatta immikkoortuani maani kujataani ilisimasaminnik tapeeqqullugit. Misissuinermi ilaatigut ullumikkut angalaniarnermi ingerlaatsimi atuisut qanoq ilorrisimaartiginersut paasiniarneqassaaq, kiisalu angalaniarnermi pingaarnerpaamik kissaatigisaat nunanut allanut toqqaannartumik angalaniarnikkut periarfissat pingaartinneqarnerunersut imaluunniit angalavissat nunatta iluani akunniliilluni mittariaqarneq perusunneraat imaluunniit nunanut allanut angalavissanut naleqquttunut angalarusunnerunersut, Innovation South Greenland tusagassiutinut nalunaarummi allappoq.

Angalaniarnermut periarfissat suunersut ilaatigut apeqqutigineqarpoq.

Ineriartornermut sunniisoq

Sarah Woodall, Tourism Destination Manager Innovation South Greenland A/S, isumaqarpoq angalaniarnermi atugasarititaasut aaqqiivigisariaqartut unamminartut pakkersimaarniarlugit aallartiffigissallugu pissusissamisoormat, tamannarpiarmi pisuulluni maani Kujataani takornariartitsinermik inerisaaneq ajornakusoorsimaqaaq.

- Nunap ataqatigiinnermut attaveqarfii sukkanerpaamik eqqarsaatigeqqitassaapput. Ullumikkut angallannermi pissusiviusut takornariaqarnermik inerisaaniarnermut akimmiffiliinerpaapput. Mumisitsiniaraanni tamanna unnuaanerinnaani pisinnaanngilaq, siunitsinnilu mittarfissamik sanaartuiniarneq erseqqiffaarissumik piffissaligaavoq, taamaammat massakkut pilersaarusiortariaqarpugut mittarfissaq luamik atorumallugu ilami massakkut pilersaarusiukkavut ukiut tallimat qaangiuppata aatsaat piviusunngussapput. Takorluugaq tassaavoq Nunatta Kujataa ukioq kaajallallugu tikinneqarsinnaanngussasoq angalanissanillu tatiginartunik ataqatigiissunillu neqerooruteqartalersimassasut nunatta iluatigut nunanulluunniit allanut – sumukarumagaanni, oqarpoq.

Misissuinermut uani peqataagit

Powered by Labrador CMS