Sulisut kattuffiata peqqinnissaqarfimmi kukkuluttornerit amerlanerulersinnaanerat aarleqqutigaa

Kukkunerit nalunaarsorneqartarnissaat tunulliunneqartariaqartoq sulisut ilisimatinneqarsimammata, aningaasaqarnerullu tatisimaneqarnerata kinguneranik nakorsiartut katsorsarneqarneranni kukkusoqarnerulersinnaavoq. Peqqinnissaq pillugu kattuffiit, PPK, siulittaasuat Ken Jensen taama isornartorsiuivoq.

Peqqinnissaq pillugu kattuffiit, PPK, nakorsiartut katsorsarneqarnerani kukkusoqarnerulersinnaanera pillugu ernummateqarpoq. Peqqinnissaqarfiup iluani kattuffiit arlallit ataatsimoorlutik kattuffiat ilaasortaasunit saaffigineqartarsimavoq, taakkulu ilisimatitsisarlutik ulapaarneq peqqutigalugu siunertarinagu kukkunernik nalunaarsuisarneq soqutigeqquneqanngitsoq.

- Uungaralaaq isigaluni eqqarsarnerup amigartumillu pilersaarusiornerup, maanna napparsimmavinni kukkunerit amerlinerannik kinguneqarnissaa ernumassutigaarput , siulittaasoq Ken Jensen tusagassiutinut nalunaarutimini nassuiaavoq.

Siulittaasoq Sermitsiaq.AG oqaluttuarpoq piaarinani kukkunerit nakorsiartup misissorneqarnerani kukkunerusinnaasut, aammali nakorsiartup illoqarfimmut allamut nakorsiarnissaanut tunngatillugu angalatinnissaanik puigorsimaneq piaarinani kukkunerusinnaasoq.

Inuiaqatigiinnut akisuvoq

- Kukkunerit taama ittut akisoorujussuupput, nalunaarsorneqarsimanngippatalu kingusinnerusukkut assiganik kukkusoqaqqissinnaavoq. Tamanna peqqinnissaqarfimmut inuiaqatigiinnullu akisoorujussuuvoq, Ken Jensen Sermitsiaq.AG-mut oqarpoq.

Taassuma erseqqissaatigaa misilittakkat takutikkaat kukkusoqartartoq. Taamaammat piaarinani kukkunerit nalunaarsorneqanngippata, kukkoqqinnissat pinaveersaartinneqarsinnaanngillat, nakorsiallu isumannaannerusumik sullinneqarnissaat anguneqarsinnaanngimmat, taanna isornartorsiuivoq.

Inuuneq toquluunniit pineqarsinnaapput

Peqqinnissaq pillugu kattuffiit tusagassiutinut nalunaarutimini erseqqissaavoq piaarinani kukkunerit nalunaarsorneqannginnerinut ulapaarneq utoqqatsissutaasinnaanngitsoq. Nalunaarsuinngikkaannimi nakorsiartunut kukkuluttorneq pillugu nalunaarsorneqarneq ajorpoq.

- Ulapipallaarneq tunngavilersuutaavoq. Uangali isumaga naapertorlugu peqqinnissarput akuttunngitsunillu inuuneq toquluunniit pineqarpata, siunertarinagu kukkunerit sapinngisamik
annikinnerpaaffisaanniitinnissaat pingaaruteqarnerpaavoq , tusagassiutinut nalunaarummi allassimavoq.

Isornartorsiuineq eqqunnginnerarpaa

Sermitsiaq.AG-p kattuffiup isornartorsiuinera pillugu oqaaseqartitsiumalluni peqqinnissaqarfimmi qullersat saaffigai.

- Nakorsiartut ukkatarineqarnerannut suna allaluunniit akornutaassanngilaq. Taamaattumik nakorsiat isumannaatsumik pineqarnissaat pingaaruteqarluinnartuuvoq. Tamanna katsorsaanissamut neqeroorutini peqqinnissaqarfiullu iluani suleriutsini atuuppoq. Piaarinaatsoornermi pisartut nalunaarsorneqartarnerat, nakorsiallu sullinneqarneranni malitseqartitsinerit ukiuni kingullerni nukittorsarneqarsimapput. Isornartorsiuinerli suugaluarpalluunniit qanoq iliuuseqarnissamut, ilutsinni oqaloqatigiinnissamut imaluunniit paasissutissiinerulernissamut iliuuseqarfiusariaqarpoq. Peqqinnissaqarfimmi qullersat ilaatigut PPK ilaatillugu oqaloqateqarnissaminnut qilanaalereerput, peqqinnissaqarfimmi qullersani, qullersaqarfimmi pisortaq, Malene Nielsen allakkatigut akissuteqarluni allappoq.

Powered by Labrador CMS