Maliina: Kiffaanngissuseqarnissara pisariaqartippara
Maliina Abelsenip 43-nik ukiullip sapaatip akunnerata matuma siorna tamatta tupaallatsippaatigut, Air Greenlandimi niuernermi pisortatut tunuariasaarami. AG-mit apersorneqarnermini, sooq atorfik aningaasarsiffiulluartartoq qimallugu kiffaanngissuseqarluni inoorusussimanini nassuiarpaa
Maliina Abelsenip ukiut pingasungajaat Air Greenlandimi niuernermi pisortaareerluni paasiartulersimavaa, allamik susoqartariaqartoq. timmisartuutileqatigiiffiullu periusissiassaata nutaap atuutsinneqartussanngornera aappaagumullu aningaasasst inissinneqalernerat tunngavissaalluarput allamik sammisaqalernissamut.
Ullaakkut iteraangami suliartornissamut erinisunneq kajumissuseqarnerlu allanngortoq malugisinnaasimavaa, soorlu timikkut aamma ippigusuuteqalersimalluni.
Angusarpassuit
- Ukiut pingasut kingulliit kingumut qiviassagaanni, angusarpassuaqarpugut, Maliina Abselsen erseqqissaavoq, oqaatigalugulu ilaasartut amerleriarsimasut, kaaviiaartitsinerulertoqarsimasoq sullitallu naammagisimaarinninnerulersimasut. Aamma sulisut imminnut pinnatik – sullitalli pillugit sullissinissaannik anguniagaqarneq siuttuuffigisimavaa.
- Qularutigineqassanngilaq pimoorussillunga sulisarama naammassisaqarusuttartungalu. Kiffaanngissuseqarnissarali aamma pisariaqartippara. Allanngortoqarnissaanut iliuuseqarnissamullu inissaqartariaqarpoq. Sulisarninni allanngortitsisarnikooqaanga, Maliina Abelsen oqarpoq, nangillunilu:
Sapiissuseqarneq toqqissisimanerlu
- Nutaanik soqutiginartunillu anguniagarnermik nuannarinninnera ilunni pigisimassavara. Immaqa soorlu uanga Pippi Langstrømpe sapiissuseqarnerminik ilisimaneqartoq peqatigalugulu qanigisami akornanni toqqissisimasumik inuuneqarnissamik pisariaqartitsisoq, imminut oqaluttuarivoq.
Maliina Abelsen niviarsiaqqanut qulinik aqqaneq-pingasunillu ukiulinnut anaanaavoq, inuunermilu ingerlaffissaata affaani “naleqartitanik” sorlernik atugaqarluni inuuneqarnissani ullumikkut eqqarsaatiginerullugit. Tamanna piffissami aggersumi eqqarsaatiginiarpaa.