Pineqaatissiissut: Ukiukitsoq ukiuni 14-ini kinguaassiuutitigut innarlerneqarnissamik sioorasaarneqartarsimasoq

Angutip 50-it naangajalerlugit ukiullip ukiuni 14-ini niviarsiaraq ukiukitsoq kinguaassiuutitigut innarlerniarlugu sioorasaartarsimavaa

Nunatta Eqqartuussiviani angut 50-it naangajalerlugit ukiulik pinngitsaaliisimasutut pisuutinneqarpoq. Illortaami pania imminermini najugalik, ukiuni 14-ini kinguaassiuutitigut arlaleriaqaluni innarlertarsimavaa. Atoqatigisarsimanngilaa, allatigulli innarlertarsimavaa, ilaatigut usumminik milutsissimavaa.

Angut innarliinerminut atatillugu annersaasarsimanngilaq, niviarsiaqqamulli siusinnerusukkut nakuuserniartarsimalluni, soorlu qisuariataartartuusoq oqaatigineqartoq, taamaammat niviarsiaqqap angut ersigisimavaa.

Nunatta Eqqartuussiviani eqqartuussinermi taamaalilluni pingaartinneqarsimapput, innarliinerit annersaanissamik sioorasaaraluni pisarsimaneri, tamannalu tunngavigalugu pinngitsaaliinertut pineqaatissiissutaassasoq aalajangiunneqarluni.

- Soorunami naammagisimaarparput, piumasarput naapertorlugu eqqartuussisoqarmat. Tamatuma saniatigut maluginiagassaavoq, Nunatta Eqqartuussivianit niviarsiaqqamut sioorasaarisarnerup pineqarnera akuersaarneqarmat, taamalu angut kinguaassiuutitigut innarliinerminut atatillugu timikkut annersaasarsimanngikkaluartoq pinngitsaaliisimasutut eqqartuullugu, unnerluussisoq Sofie Ramsrud Goodwin tusagassiutinut nalunaaruteqarnermini oqarpoq.

Innarliisimanerit 2002-miit 2016-imut pisarsimasut.

Angut ukiuni marlunni isertitsivimmiittussatut pineqaatissinneqarpoq niviarsiaqqamullu 75.000 koruuninik taarsiisussanngortinneqarluni. Nunatta Eqqartussivianit taamatut eqqartuussinikkut Qaasuisup Eqqartuussiviani ukioq manna apriilip qaammataani eqqartuussut taamalilluni aalajangersarneqarpoq.

Suliaq Ilulissani ingerlanneqarsimavoq

Powered by Labrador CMS