SQAPK: Aalisartut akuersissutaatillit ikinnerutikkusuppagut
Sinerissap qanittuani aalisartut piniartullu kattuffiata, SQAPK, aalisartut akuersissutaatillit ikinnerulersikkusuppai. Tamatuma saniatigut aalisartut kissaateqarput, aalisartut namminneerlutik pisassaqartalissasut, pisassat ataatsimoortut pagganneqartannginniassammata.
Aalisarnermi tunisinissamut akuersissutinik tunniussinermi, umiatsiaararsorlutik aalisarnermik inuussutissarsiuteqartut salliutinneqartariaqarput. Aalisartut akuersissutaatillit ikinnerusariaqarput. Aalisartut pisassaat aalisartunut agguaanneqartalertariaqarput, aalisartut sisamat tallimalluunniit pisassanik avitseqatigiissinnaasunngorlugit. Taamaaliornermi pisassat aalisartunit pagganneqarunnaarniassammata. Qalerallillu tunitsivinnut tunineqarsinnaasut oqinnerpaaffissaat maanna 450 grammimiittoq, 1.000 grammimut qaffanneqartariaqarpoq.
Sinerissap qanittuani aalisartut piniartullu kattuffiat, Ilulissani aallartissimasoq, taama isumaqarpoq.
- Politikkikkut aqunneqarnerput ima sanngiitsigisimassanerpoq, allaat aningaaseriviit nunatsinnut sunniuteqartut aalisarnerup aqunneqarneranik inagiiniarnissamut periarfississinnaallugit? SQAPK-mi siulittaasoq Erik Lange tusagassiutinut nalunaaruteqarluni apeqquteqarpoq.
Taassuma nunami politikerit siuttut sanngiippallaamik sunnerneqariaannarmillu politikkeqarnerarlugit isornartorsiorpai.
Aalisartut amerlavallaarput
- Nalunngilara umiatsiaaqqat qaleralinniat amerlavallaalernerat pillugu oqaruma aalaniartoqassaqisoq, ilumoorpormi ullumikkut inuussutissarsiummik tamatuminnga ingerlatisut, qaleralinniarnermik annerusumik ilisimasaqaratillu saniatigut suliffeqareersut qaleralinniarsinnaanermut akuersissutinik tunineqartartut amerlavallaaqaat . Aalisarnermik ilisimasaqartut taakkuupput akuersissutinik peqartariaqartut, Erik Lange allappoq.
Aalisarnermut naalakkersuisoq, Jens Immanuelsen, paragraf 37 atorlugu akissutimini ilisimatitsivoq inuussutissarsiutigalugu aalisartut 1.772-it umiatsiaararsorlutik 2018-imi pisaqarsimallutik nalunaarsimasut. Umiatsiaararsortut Ilulissani amerlanerpaapput, taavani 176-it pisaqarsimallutik 2018-imi nalunaarsimammata, tulliupput Uummannami umiatsiaararsortut, 112-it pisaqarsimallutik nalunaaruteqarsimammagamik.
- Taamatut aaqqissuussinerup saniatigut pisassanik piginneqatigiinnermik periarfissiinerit pisariaqarput, soorlu umiatsiaaqqat sisamat tallimalluunniit ataatsimut pisassanik piginneqatigiilersinnaapput umiatsiaaqqatik pigiinnarlugit taakkualu aalisaatigalugit, allassimavoq.
Grønlandsbankenip aalisartunut aningaasaliinini unitsissimatsiaannaraa, aalisarnerup aaqqissuuteqqinnissaanut aalisartut piniartullu kattuffia taama siunnersuutigineqarpoq. Grønlandsbankenip unitsitsinermini tunngavilersuutigaa aalisarneq aningaasaqarnikkut biologillu innersuussinerat malillugu imminut nammassinnaanngimmat. Grønlandsbankenip aarleqqutigaa qanoq iliortoqanngippat aalisarneq ajalusoorluinnassasoq.
GrønlandsBankenilli taama nalunaareernermi kingorna aalisartut akiliisinnaalluartut ammaassiffigeqqippai.
Qalerallit oqimaannerusut tunisaasariaqarput
SQAPK isumaqarpoq qalerallit tunisaasut oqippallaartut. Qalerallit tunisat maanna 450 grammimik oqinnerpaaffilerneqarsimapput. SQAPK-p piumasaraa qalerallit tunineqarsinnaasut oqinnerpaaffiat 1.000 grammimut qaffanneqartariaqartoq, qalerallit oqimaannerulerniassammata.
- Aqqutissat tamakkua atorlugit ingerlagaanni, pisat tunineqarnerminni nalitunerusumik tunineqarsinnaanerat anguneqarsinnaavoq, ullumikkummi suliffissaqartitsineq kisiat aallaavingalugu aalisarneq ingerlanneqarpoq, taamaasilluni tunisassiorfiit ingerlaasaat pissutaalluni aalisarneq
aqunneqarsinnaalersarluni, soorlu aamma grønlands bank taamaasiortoq takusaleripput, Erik Lange naggasiivoq.
Umiatsiaararsorluni aalisarneq pillugu pisut uani atuarsinnaavatit.