Grønlandsbanken: Suliffeqarfiit iluanaarutitaqanngitsunik ernialersorneqassasut
Grønlandsbankip qammatinut pingasunut naatsorsuusiani tamanut saqqummiuteqqammerpaa. Tassani aningaaseriviup suliffeqarfiit iluanaarutitaqanngitsumik ernialersorneqarnissasut kalerriutigaa
Suliffeqarfiit Grønlandsbankimi kontominni aningaasaateqarniarunik akiliuteqartalissapput.
Aningaaseriviummi Nationalbankimi aningaasanillu niuerfinni aningaasat uninngasuutigisat erniaat iluanaarutissartaqanngitsut nammineq akilertarpai. Peqatigitillugu ukioq manna qaammatini qulingiluani siullerni aningaasat aningaaserivimmiititat amerlisimapput, tamanna qaammatinut pingasunut naatsorsuusiani takuneqarsinnaavoq.
Aningaasanut aningaaserivimmiititanut annertuunut taamaallaat erniaqartitsivugut iluanaarutissaqanngitsunik, kisianni novemberip aallaqqaataaniit inuussutissarsiortunut eniat iluanaarutissartaqanngitsut annerusumik atuutilersissavavut, tamannalu aaqqeeqataajumaarpoq.
- Inuinnarnut sullitatsinnut suli iliuuseqanngilagut, kisianni aningaasanik aningaaserivimmiititaqarnermi ineriartorneq malinnaaffigaarput, Martin Kviesgaard tusagassiorfinnut nalunaaruteqarnermini oqarpoq.
Naammaginartumik angusaqarneq
Qaammatinut pingasunut naatsorsuusiat ataatsimut isigalugit naammagisimaannartumik angusaqarfiupput, tassa qaammatini qulingiluani siullerni akileraarutit ilanngaatiginagit 115,9 millioner koruuninik angusaqartoqarpoq, 2018-imi kr. 106,9 millioner koruuninik angusaqarsimanermut sanilliullugit, appartitsinerillu annikittut aamma nalinik iluanaarutitalinnik nalimmassaanerit iluaqutaanikuullutik. Nalinik nalimmassaanerit aamma appartitsinerit akileraarutissat ilanngaatigereernagit 112,7 millioner koruuniupput, siornalu 115,5 millioner koruuniusimallutik.
2019-imi qaammatini qulingiluani siullerni, 2018-imituulli, aningaaserivimmit taarsigassarsiaritinneqarsimasut ikilisimapput, aningaaserivimmiilli ukioq manna qaammatini qulingiluani siullerni taarsigassarsiaritinneqarsimasut 221 millioner koruuninik amerleriarsimapput, septembarillu qaammataata naanerani katillutik 3.694 millioner koruuniusimallutik. Tassa qaammatit qulingiluat ingerlaneranni 6,3%-imik qaffassimallutik.
- Ukioq manna qaffariarneq ataatsimut isigalugu iluarusimaarnarpoq aamma tamatuma uppernarsarpaa nunatsinni suliniuteqarluartoqartoq. Kalaallit Nunaanni qajannaatsumik ineriartortoqarnissaa tapersersorluassavarput, Martin Kviesgaard oqarpoq.
Naatsorsuutigisanik qaffaalaarneq
Qaammatit pingasut kingulliit kisiisa isigalugit, tunngaviusumik isertitat pitsanngorsimapput, isertitat amerlisimapput aamma qammatinut pingasunut siullernut tulliinullu sanilliullugit aningaasartuutit tamarmiusut ikinnerusimapput.
- Qaammatini kingullerni pingasuni isertitat annertusisimapput, pisarnermiillu akileraarutit annikinnerusimallutik, taamaammat tunngaviusumik isertitagut qaammatinut pingasunut naatsorsuusiornermi aatsaat taama pitsaatigipput. Tamatumunnga pissutaanerpaavoq aningaasat taarsigassarsiaritinneqartut qularnaveeqqutaasimasullu aatsaat taamak annertutigineri. Tunngaviusumik ingerlatsineq ernianit iluanaarutissartaqanngitsunit aamma malittarisassanut aningaasartuuteqaleraluttuinnarnermit tatineqaraluartoq, angusaqarluarneq soorunami pitsaasuuvoq, Martin Kviesgaard oqarpoq.
Ukiumut angusassatut naatsorsuutigisat 135-155 millioner koruuninut maanna qaffanneqarput, kingullermik 130-150 millioner koruuninik angusaqarnissamik naatsorsuuteqartoqarsimagaluarluni. 2018-imi akileraarutissat ilanngaatigereernagit 140,3 millioner koruuninik angusaqartoqarpoq.