Plastic not so fantastic: Stockholmimut angalaneq pissarsiaqarnartoq
"Plastic not so fantastic" Nunat Avannarliit Siunnersuisoqatigiiffianit avatangiisit pillugit nersornaammik tunineqanngikkaluartoq, aallarneeqataasut ilaata Stockholmimut angalaneq pissarsiaqarnarluartutut nalilerpaa.
Ilisimaneqareersutut Nunat Avannarliit Siunnersuisoqatigiivi Stockholmimi Sverigemi Sessioneqarmata, Nunat Avannarliit Siunnersuisoqatigiivisa avatangiisit pillugit nersornaasiuttagaat Gretha Thunbergimut tunniunneqarpoq.
Giiti Titussenili misigisimavoq Stockholmimut angalaneq, naligisanillu naapitsineq, pissarsinarluinnartuusoq.
Facebookimi qupperneq ‘Plastic not so fantastic’ Nunat Avannarliit Siunnersuisoqatigiivisa avatangiisit pillugit nersornaasiuttagaannut innersuunneqarpoq, nersornaaserneqaranili.
- Angalaneq nuanneqaaq. Uagutsitut suliniutillit arlallit naapippakka, paasissutissanillu amerlasuunik pissarsillunga. Nunarsuummi sinnerani plastikki aamma ajornartorsiutaangaatsiarpoq, Giiti Titussen Sermitsiaq.AG-mut oqaluttuarpoq.
Nunani avannarlerni ilisimaneqareersoq
Giiti Titussen oqaluttuarpoq Nunani Avannarlerni tusagassiortut ilisimatusartullu Facebookimi qupperneq, kajumissutsiminnik suliaqartut ingerlataat, Kalaallit Nunaannilu plastikkimik annikinnerusumik atuilersitsinissamut suliniut, ilisimaneqarluartut.
- Avatangiisit pillugit suliniuteqartut allat aamma soqutiginnilluarput. Suleqatigisinnaasatsinnik soqutiginartunik naapitsivunga. Soorunami namminneq najukkaminni suliaqassapput, taava taamatut suleqatigiissinnaavugut, Giiti Titussen nassuiaavoq.
Ilisimasat nutaat
Giiti Titussen Facebookimi qupperneq sinnerlugu Sverigemiinnermini, ilinniarfimmi School of Economicsimi nioqqutissat poortorneqarsimanngitsut pillugit saqqummiivigineqarpoq. Ilinniarfiup pingaartumik tiit puussiaaqqanut kinissutinut poortorneqarsimanngitsut saqqummiuppai.
- Allatut iliortoqarsinnaaneranik takutitsivoq, soorlu nioqqutissat poortorneqanngitsut eqqarsaatigalugit. Taamaaliornikkut aamma poortuutit plastikkillu inginneqaannartussat ikilisinneqarsinnaapput, Giiti Titussen oqarpoq.
Eqimattap suliffeqarfiit niuertarfiillu attavigisareerpai plastikkimik atuinerulernissaq anguniarlugu, aammali WWF Grønland sinerissami sissami igitakunik katersisoq misissuisorlu ikiorlugu kajumissutsiminnik ikiuussinnaasunik ujartuisarpoq. WWF Grønland sinerissami sissami igitakunik katersillunilu misissuileruttorpoq, taamatut iliornikkut igitat ikilisivinnissaanut qanoq iliuuseqartoqarniassammat.