Danskit aningaasanut inatsisaat: Politiit aningaasarsiaasa assigiinngissusaat pillugu oqaatsit sakkortuut

Aaja Chemnitz Larsenip isertitsivinni parnaarussivinnilu sulisut aningaasarsiassaannut atlantikup avannaamiuinut immikkoortitanit atuisoqarniarnera 'ajorluinnartutut' taavaa

Kalaallit Nunaannit folketingimi ilaasortat marluullutik aningaasanut inatsisissaq folketingimi oqallisigineqarmat sakkortuunik oqaaseqarput. Pingaartumik Kalaallit Nunaanni politiit isertitsivinnilu sulisut aningaasarsiakinnerunerat sakkortuumik oqaaseqarfigineqarpoq.

Aaja Chemnitz Larsenip (IA) oqaatigaa, najukkani politiinik sulisoqaannarnissamut ajornartorsiortitsisumik 'naammaginanngitsumik immikkoortitsisoqartoq', tamatuma malitsigisaanik tikisitat 2016-imiilli 40 procentinik amerlineqartariaqarsimanerarpai.

- Naalagaaffiup suliassaa, tassalu sulisuminik pitsaasumik naligiimmillu pinnittarnissaa isiginngitsuusaarsinnaanngilarput, oqaaseqartartutut oqaaseqarami oqarpoq.

- Oqaatigeqqissanagu neriuutigingaluarpara

Aki-Mathilda Høegh-Dam (S) isumaqarpoq, aningaasarsiatigut assigiinngissitsiuarneq Danmarkip Kalaallillu Nunaata akornanni tatiginninnginnermik pilersitsisartoq.

- Immikkoortitaaqqikkusunngilagut. Tassami danskit naalagaaffianni innuttaasutut sumiluunniit najugaqaraluaraanni suliaq ataaseq assigiimmik aningaasarsissutigineqartussaavoq, taanna oqarpoq.

Politiit marluk ukioqatigiit, politiinngorniarfimmi ataatsikkut ilinniarsimasut politiillu biiliani ataatsimi issiaqatigiittut assersuutigai, politeeq Danmarkimeersoq aningaasarsiaqarneruvoq, naak politeeq Kalaallit Nunaanneersoq najukkami pissutsinik ilinniartitsillunilu oqaatsitigut ikiuuttaraluartoq.

- Tamanna oqaluttarfimmiit oqaatigeqqikkusunngikkaluarpara; aningaasarsiatigulli assigiinngissitsinerup atorunnaarsinneqarnissaata tungaanut oqaatigiuassavara, Aki-Mathilda Dam-Høegh (S) oqarpoq.

Assigiinngitsunik akulerussineq

Aaja Chemnitz Larsen (IA) isumaqarpoq, danskit naalakkersuisuisa aningaasarsiat naleqqussarniarlugit atlantikup avannaamiuinut immikkoortitanit naalakkersuisut siuliisa pilersissimasaannit tigusiniarlutik nalunaaruteqarnerat akuersaarneqarsinnaanngitsoq. Immikkoortitat Naalagaaffeqatigiinneq pillugu piviusulersaarutinik filmilornissamut aamma naalagaaffeqatigiit akornanni ilinniartunik paarlaasseqatigiittarnissamut atugassiaapput. Aamma immikkoortitat 15 millioner koruuniniit 20 millioner koruuninut qaffanneqarsimagaluartut, politiit aningaasarsiassaannut atugassanik taakkunannga tigusiniarneq paatsoornerusoq taanna isumaqarpoq.

- Tamanna assigiinngitsunik akulerussineruvoq. Ineriartortitsinermut aningaasasssat ingerlatsinermut aningaasassanut akuliunneqarput. Suliniutissat ataavartumik ingerlatanut akuliunneqarput, Aaja Chmenitz Larsen (IA) oqarpoq.

- Tassa aningaasat ineriartortitsinermut atugassat ingerlatsinermi amigaataasunut matussutissatut atorneqarniarnerat ajorluinnarpoq.

Taassum nalilerpaa, politiit isertitsivinnilu sulisut aningaasarsiaassa assigiinngissusaat atorunnaarsinniarlugu katillugit 6,2 millioner koruunit atorneqassasut.

Powered by Labrador CMS