Sulisitsisut: Aningaaseriviup aalisarneq pimoorunneqartoq erseqqissaatigaa

Nungusaataanngitsumik aalisarnissaq qulakkeerneqanngippat avammut tunisaqartarneq ulorianartorsiortinneqarsinnaavog aamma Kalaallit Nunaat nunanit tamalaanit upperineruusinnaavoq

Grønlandsbankenip umiatsiaararsorluni aalisartunut aningaasaliissuteqaqqinniarani aalajangernera Sulisitsisut nungusaataanngitsumik aalisartoqarnissaanik kissaateqarneranut naapertuuppoq.

- Grønlandsbankenip umiatsiaararsorluni aalisartunut aningaassaliissuteqaqqinniarani aalajangerneratigut aalisarnermik pimoorussinneq erseqqissaaffigineqarpoq, Sulisitsisut pisortaanera Brian Buus Pedersen Sermitsiaq.AG-mut erseqqissaavoq.

Aningaaserivik isornartorsiuisoq

Grønlandsbankenip, politikkerit biologit inassuteqaataat sinnerujussuarlugit sineriammut qanittumi aalisartunut pisasseeqqeqattaartarnertik ilutigalugu aalisarnissamut akuersissutinik amerlanerujussuarnik tunniussisarnerat isornartorsiorpaa.

Grønlandsbankenimi pisortaaq Martin Kviesgaard ataasinngormat oqarpoq, politikkikkut nutaamik siunnerfeqartoqartariaqartoq.

Brian Buus Pedersenip erseqqissaatigaa, Sulisitsisut ukiorpassuarni sorsuutigalugulu nipituuliuutigisarsimagaat, aalisarnerup nungusaataanngitsumik ingerlanneqartariaqarnera:

- Sulisitsisuniit ukiorpassuarni sorsuutigisimavarput nungusaataanngitsumik aalisartoqartarnissaa. Ataatsimoorlutami taamaaliunngikkutta avammut tunisaqartarnerput ulorianartorsiortillugulu nuna uppernarunnaartissavarput, sulisitsisut soqutigisaqaqatigiiffiani pisortaaneq erseqqissaavoq.

Piumasaqaatit arfinillit

Piumasaqaatit arfinillit kattuffiup iliuuseqarfigineqartariaqarsorisai ukuupput:

Pisassiissutit biologit inassuteqaataannut naapertuuttunngortillugit appartinneqarlik

Pisassiissutitaqanngitsumik aalisarneq unitsinneqarli

Akuersissutit unitsinneqarlutillu ikilisinneqarlik

Paggatassiissuteqartarneq unitsinneqarli

Pisassiisutit ataasiakkaarlugit tunineqarsinnaanerat atuutsinneqalerli (IOK).

Aalisarnerup umiatsiaararsorlutik aalisartunut naammattumik amerlassusilinnut aningaasatigut nammanneqarsinnaaasunngortinneqarneratigut, Avannaani aalisarnermik inuussutissarsiuteqarneq attassinnaallugulu aalisakkerivinni suliffissaqartitsilissaagut.

Pisariaqartoq

- Piumasaqaatit taakku tamarmik sineriammut qanittumi qaleralinniarnermi aalisakkat piujuartinneqarnissaannut aningaasatigullu nammassinnaasunngortinneqarnissaanut atorneqassapput. Taakkumi tamarmik pisariaqarput aalisarnermi MCS-imik meqqilersuisoqassappat, aalisartoqanngippammi kusanarluinnartumik tungujortumik meqqilersuisoqarsinnaanngilaq, aamma aningaasaqarnikkut siuariartortitsinissaq, piitsuussusermik nungusaanissaq il. il. pillugit nunarsuarmi anguniakkanut tunngatillugit tusaamanerluutigilersinnaavarput, Brian Buus Pedersen erseqqissaavoq.

Powered by Labrador CMS