Banknordik umiatsiaararsorlutik aalisartunut ikiuisarnerminik ingerlatsiinnarniartoq

Savalimmiuni Banknordikimi pisortaanerup Árni Ellefsen ip umiatsiaararsorlutik aalisartut aningaasatigut tapiiffigineqartarnerat imaaliinnarlugu unitsinnianngilaa.

- Banknordikimi sullitavut aningaasaliiffigineqarnissamik qinnuteqaraangata, suliat ataasiakkaarlugit nalilersortarpavut. Tamanna aamma umiatsiaararsorluni aalisartunut tunngatillugu atuuppoq, tassa aningaasaliissuteqarnissamik aalajangiitinnata aningaasatigut imminut napatittoqarsinnaanersoq isummersorfigiuaannarparput, bankimi pisortaaneq Sermitsiaq.AG-mut mailikkut ilisimatitsivoq.

- Tassa umiatsiaararsorlutik aalisartut aningaasaliiffigisarunnaarnissaat pillugu aalajangiisimanngilagut, pisortaaneq Árni Ellefsen erseqqissaavoq.

Pisortaaneq nungusaataanngitsumik aalisarnissaq pillugu oqaaseqanngitsoq

Savalimmiuni pisortaaneq nungusaataanngitsumik ingerlatsinissaq pillugu aamma FN-ip nungusaataanngitsumik ingerlatsinissaq pillugu anguniagaanut isummeqquneqarsimavoq. Pineqartoq pisortaanerup Sermitsiaq.AG-mut mailikkut nassiussigami oqaaseqarfiginngilaa.

Grønlandsbankenip umiatsiaraarsorlutik aalisartunut aningaasaleeqqinnginnissaminut tunngavilersuutaata ilagaat aalisakkat aningaasaqarnerlu eqqarsaatigalugit nungusaataanngitsumik ingerlatsisoqannginnera.

- Uagut Kalaallillu Nunaat taamatut ingerlaannassagutta aningaaserivittut nunatullu naatsorsuutigineqartutut suliassatta akerlerluinnaannik iliuuseqassaagut, Martin Kviesgaard biologit inassuteqaataat sinningaatsiarlugit pisassiissuteqartarnermi nungusaataanngitsumik ingerlatsisoqannginnera pillugu oqarpoq.

Naqissuserneqarnissamik ernumassuteqarneq

Martin Kviesgaard itisiliivoq:

- Ernummatigaara Kalaallit Nunaata nungusaataanngitsumik ingerlatsinngitsutut naqissuserneqarnissaa, aamma aalisakkat ikiliartornerat milliartornerallu ilutigalugit inuussutissarsiutip aningaasaqarnikkut ajalusoorsinnaanera ernummatigaara.